Vawiin khan Parliamentary Secretary Pu Lal Thanzara’n Selesih Veterinary farm-ah ar vulh leh zuar a eizawngtuten awlsam leh hlawk zawka ar an sawngbawl theihna tur khawl district tin atanga thlan bikte hnenah a sem.

Pu Lal Thanzara chuan tanpuina dawng tute chuan a thlawn a an thil dawn chu taima tak leh malsawmtlak a, a tangkai thei ang ber a hmang turin a chah a. Vety Department chu Sorkar hmalakna tha taka an kalpui thin chu lawmawm a tih thu a sawi bawk a ni. Sorkar laipuiin RKVY kaltlangin kut hnathawktute tanpuina tur ruahmanna tha tal a rawn siam a, chutiang bawkin Mizoram Sorkarin NLUP hmangin kuthnathawktute dawmkanna a siam bawk a. Heng Sorkar hmalakna te hi a zarzotuten a nihna tur dik taka an hman chuan ram leh hnam tana mawlsawmna leh hmasawnna a thlen thei a ni, a ti.

Mini Poultry Processing Plant an sem hi Hyderabad a siam a ni a. RKVY sum atanga lei niin khawl pakhat hi Rs. 2,81,365 man a ni. Single phase electric power hmangin, darkar hnih a ar 500 aia tlemlo puah theihna a ni. Tanpuina dawngtu mi 18 te hi District tin atanga thlan khawm niin, a khawl hman dan tur training pek an ni ang.

He khawl semna inkhawm hi AH&Vety Director Pu L.B. Sailo-an a kaihruai a, Jt. Director Dr. P. Lalbiakliana’n Technical Report pe in, Dr. K. Lalrohluan lawmthu sawina in a khar a ni.

He inkhawm zawhah hian Pu Lal Thanzara chuan Vety Farm chhunga Regional Boar Semen Station sak thar chu a tlawh bawk.