Vawiin khan Lunglei-a DFDO Office thar, Bazar Veng chu HPC Vice-Chairman Pu Joseph Lalhimpuia'n hawng. Hawnna inkhawm Lunglei DFDO Pu Lalhmangaiha kaihhruaiah Khuallian Pu Joseph Lalhimpuia chuan District Council atanga State puitling nih hnu kum tam tak chhung khan Lunglei mipuite chu hlamchhiah nia inhriatna an nei fo thin a, tunah chuan sorkar hmalakna hrang hrang avangin Lunglei District pawhin hmasawnna namen lo a hmu chho zel a ni, a ti.

Vawiina DFDO office thar chu mipuite tan, a bik takin sangha kawia eizawngtute tan malsawmna thar a ni zel a; sorkarin sum leh pai tam tak sengin mipuite hamthatna turin ruahmanna a siam thin te chu mipuite tan a ni tih hre renga, a hnathawkte pawhin phur leh thahnemngai taka an thawh hi ram leh hnam tan missionary hna a tling a ni, a ti. Mizoram-a sangha zaa 80% chu Silchar atanga lo lut niin state chhunga dehchhuahte pawh Vairengte, Kawnpui leh Kolasib bial ami a ni deuh bera a hriat thu sawiin Pu Joseph Lalhimpui chuan Lunglei-ah DFDO Office changtlung zawk leh sangha chi khawina Fish Seed Farm neih a nih tak chu Mizoram chhim lama sangha khawia eizawngtu zawng zawngte tan vanneihna leh an sumdawnna lamah pawh hlawk zawka an kalpui theih nan a duhsakna a hlan a ni. Lunglei HPC Vice-Chairman chuan Mizoram hmun tam takah thing leh mau, lui leh nungcha te pawh humhalhna chang hria kan pung zel chu a lawmawm hle a ni, a ti bawk.

Technical Report petu AFO Pu H.Rothangpui chuan Lunglei DFDO Office hi kum 1975 khan Assam type-a sak a ni a, kum 12 hnuah office building thar leh changtlung tak an nei ta chu a lawmawm hle a ni tih thu a sawi. DFDO office thar hi State Fund atangin Cheng nuai 20 leh HPC atangin Cheng nuai 28 hmua sak zawhfel a ni. He Office-ah hian Officer leh Staff te room bakah Technical Room, Training Hall, Godown leh Chowkider Quarter pawh a awm a ni.