Ram chhung hmun dang ang bawkin vawiin khan Serchhip District chhunga Zirna In tinah Teachers’ Day vawi 52-na lawm a ni a, Teachers’ Day lawmna hi hun hnih ah then niin chawhma lamah Zirna In tinah hman a ni a, chawhnu lamah District pum huapin Serchhip DC Conference Hall-ah hman leh a ni.

Vawiin a DC Conference Hall-a “District-Level Celebration of Teachers’ Day-2013” hi District Bawrhsap Pi Juhi Mukherjee IAS, chuan khuallian niin a hmanpui a, thuchah sawiin Zirtirtute chu anmahni ngei hmaichhana hmuh a kawm a chak thu leh chutiang hun remchang an nei thei ta chu lawmawm a tih thu sawiin, Teachers’ Day ropui taka lawm sak a duh thu leh sum leh pai harsatna avanga a duh anga ropuia hun a buatsaih sak thei lo chu pawi a tih thu a sawi a, Programme tlawm tak a phak tawka a buatsaih chu a thinlung taka Zirtirtute a duhsakna leh chawimawi a duhna atanga lo chhuak anih thu sawiin chu chu hriatsak turin zirtirtute chu a ngen bawk a ni.

Bawrhsap chuan Zirtirtute chu khawtlanga leh Sawrkarin mi rintlak, rawn tlak leh innghahna tlaka a ngaih vangin Inthlanpui, Chhiarpui leh thil pawimawh dang dangah pawh Sawrkarin kut leh ke bera a hman an ni a, naupangte pawhin an en ber leh an zir, inchhungkhur tih lohvah chuan naupang nun kaihruai tu ber an ni a ti a, naupangte bula an nun leh tawngkam te fimkhur turin a chah bawk a, Zirtirtute chu naupangte an fuihna tawngkam khat lek pawhin chhuan tam tak lo awm tur te hmakhua tur a hril a ni tih hre tur leh, amah ngei pawh kum 20 kal ta a an zirtirtu pakhatin a fuihna tawngkam khat lek vanga tun dinhmun thleng ta a nih thu a sawi a, anmahni a thil tha awm zawng zawngte an zirlaite hlanchhawng tura chahin; kum tam tak a liam hnu pawha an zirlaite’n chhuang tak a “Ani hi min ka zirtirtu a ni” an tih theih ngeina tura tan la thar turin a fuih a ni.

Bawrhsap chuan nu leh pa ten an fate zirtirtute chu ngilnei leh zaidam, an fate duata an theihna te haichhuah sak turin an beisei vek a ni a ti a, hriatna ringawt ni lova, hriatthiamna, thiamna leh nunkhawchhuahna tlaka zirlaiten an thiamna te an hman tangkai theih nana zirtir chu an tum ber tur a ni a ti a, naupangte chu ngaihsak a an chaklohna leh an chakna lai te hrechiang tura chahin, Midday Meal thlengin chawchhumtute kuta engkim dah mai lova anmahni ngeiin enpui thin turin a ngen bawk. Bawrhsap chuan zirtirtute chu an harsatna a te ber atanga a lian ber thlenga a hnen thlen hreh lo tura sawmin; an harsatna te azirin an mamawhna te tihhlawhtlin sak theih a neih chuan theihtawp chhuah sak a inhuam thu a sawi bawk.

Vawiin Teachers’ Day vawi 52-na lawmna inkhawmah hian Serchhip khawpui huamchhunga Zirna In hrang hrang atangin zirtirtu an kalkhawm a, Education Minister Pu Lalsawta Teachers’ Day thuchah zirlaiten an chhiarchhuak a, Serchhip pawn atangin SSA Girls’ Hostel, Chhingchhip a zirlaiten item benglut leh mit ti tlai tak tak an entir a, Little Flower Convent, Serchhip a Pawl 2 zirlaite, leh Zirlai talent nei tha tak tak ten an zirtirtute chawimawi nan an talent an pho chhuak a, Zirtirtute pawhin sharing hun hmangin taima leh thahnemngai lehzual tura infuihthar tawnna hun an hmang a ni.