Vawiin khan Joseph Lalhimpuia, Vice-Chairman HPC chuan RMSA Mission hnuaia Govt H/S Lunglei building sak thar chu a hawng.

Pu Joseph Lalhimpuia chuan Govt. HS zirtirtute chu Teacher's Day chibai bukin tun dinhmun min hruai thlengtute chu zirtirtute an ni a ti. School tam tak chu kum a lo reiin a lo awngrawp telh telh a, tluchhe ta hial te pawh an awm thin a, Govt H/S Lunglei erawh chu Headmistress leh a staff te zarah a indinthar leh mek a ni a ti. Zirlaite pawh fuihin 'Zirlai hlawhtling chu mahni inthununna nei tha, midangte tana malsawmna ni thei te hi an ni" a ti. Sum harsatna tam tak karah Mizoram sorkar chuan zirna tihmasawn turin theihtawp a chhuah mek zel a ni a ti a. Lunglei khawpui chhunga University Campus leh Constituent College neih theih dan tur ngaihtuahin May ni 8 khan Chief Minister lehkha kengin UGC Chairman Ved Prakash a zuk hmuh thu sawiin, July ni 24 khan UGC Secretary Dr Akhilesh Gupta chuan Lunglei Govt College chu Constituent College ni tura an rawn pawm thu leh Mizoram University-in assesment siama Ministry of HRD hnenah UGC kaltlanga an assesment siam thehlut turin an rawn hriattir tawh a ni a ti bawk. Vawiina hawn tak RMSA building thar hi Nov. ni 24, 2012-March ni 21, 2013 inkar chhunga Rs nuai18, sing 3, sang 3, za-7, sawmsarih, panga senga sak a ni a, Laboratory equipment thar Rs Nuai 1 man pek tel nghal an ni bawk.