No.7349/2020-2021

State Institute of Rural Development & Panchayati Raj (SIRD&PR), Water and Sanitation Support Organization (WSSO) leh Public Health Engineering (PHE) Department-te tangkawp bultumin vawiin khan I&PR Auditorium leh Conference Hall, Champhaiahte Jal Jeevan Mission kaltlangin Cement Mistiri (Mason) leh tui pipe vuah leh a chhe siam tuimi (Plumber) te pualin training buatsaih a ni. Training hi District Bawrhsap Pi Maria C.T. Zuali, Chairman, Jal Jeevan Mission, Champhai District chuan khuallian ni a hmanpuiin a hawng a ni.

Pi Maria C.T. Zuali chuan Mason leh Plumber lama tuimi kalkhawmte chu hna tha, mawi leh tlo siam thei tura tan la turin a fuih a. Hnam dangte pawhbuai ngai lovin kan tih ve theihahte theihtawp chhuaha intodelh kan tum angai a ni, a ti a. Kalkhawmte chu ram hmangaihna leh intodelh duhna thinlung  pu tur leh mahni pianpui thiamnate tipunga, midangte zirtir chhawngtu leh hna siamsaktu ni thei turin a chah bawk a. Hmanhmawh luat avanga hna chhe thinte a ngaimawh thu sawiin, training tura kalkhawmte chu mi viak tha leh hna uluk mi nih tum turin a chah bawk a. An lakah beiseina sang tak a neih thu hrilhin, pawl anga inzawmkhawm thiam tur leh mamawh dan ang zela kalho thiam turin a fuih a. Training tha leh hlawkthlak tak neia, a taka chawr tangkaitu nih tum tura duhsakna hlanin training a hawng a ni. 

He hunah hian Pu Vanlalmuanawma SDO, PHED Champhai hnena atangin Jal Jeevan Mission (JJM) nihphung tlangpui ngaihthlak a ni a. Sawrkar laipui scheme pawimawh tak JJM hmangin kum 2024 ah chuan In tinah tui connectIon pek vek hman tum anih thu a sawi a. District Action Plan thukhawmin Champhai district chhunga khaw 43 thlanchhuaha In 8707 ah te tui connection pek tuma hmalak a pawmpui thu a sawi bawk. 

Training hawnna hun kaihruaitu Pu C. Lalthlansanga, Core Faculty, SIRD & PR, Course Director ni bawk chuan JJM Project hmanga hnathawh tur za zela 5 (5%) chu a  khaw neitu mipuite  tum tur anih avangin mipuite thlawp mhatna apiangah JJM scheme a hlawhtlin theih dawn thu a sawia, khaw mipuite tawiawmna a ngen nghal bawk a ni.  

Training hi thuang hniha neih ani a, Mason (cement mistiri) te hi Pu Zomawia Hauhnar, Faculty, SIRD&PR in zirtirna pe a. Plumber (pipe fitting) te hi  Pu C.Lalthlansanga, Core Faculty, SIRD & PR, Course Director ni bawk chuan zirtirna a pe a, chawhnu lamah a taka tihchhinna neih nghal niin, training chhimtute hi Certificate hlan vek an ni.

Vawiin training-ah hian Champhai district-a thingtlang khua 35 thlanchhuah atangin Mason 26 leh Plumber 42, an vaiin mi 68 an tel thei a. Training hi naktuk hian vawiina koh tell oh khaw dang zawngte tan neih chhunzawm tur a ni ang.