No.7348/2020-2021

India Republic Day vawi 72-na chu Serchhip DC tualah hman a ni a, khuallian Pu Kumar Abhishek, IAS, district bawrhsap chuan Hnam puanzar pawt pharhin chibai bukna a chhanglet.

Zing ni chhuah rualin sawrkar pisa leh hmun thenkhatah te hnam puanzar zar a ni a, zingkarah vek hian Republic Day, 2021 puala thilpekte District Hospital, Mercy Hospital, Unity Orphanage Home, Shalom Special School, Zoar Deprived Children Home, Old Age Home, Adult Rehabilitation leh District Jail-ah te pek an ni. A lawmna pui ber hi zing dar 11-ah DC Pisa tualah buatsaih a ni a, he hunah hian khuallian Pu Kumar Abhishek, IAS chuan hnam puanzar pawt pharhin chibai bukna neih zui a ni.

Khuallian chuan India ram mipuiten anmahni siam ngei ram danpui an hman tanna champha-ah Serchhip mipuite chibai bukin, mahnia ro inrela, danpui tha tak neih theih nana thawktu ram hruaitu hmasate zahna chibai a buk a. An thawhrim rah sengin tuna thangtharte chu khawvela democracy ram lian ber leh ram thiltithei berte zinga mi an lo ni ta a ni a ti. Pu Kumar Abhishek chuan ram danpui neih hnu ata India ramin hmasawnna hmel a hmu nasa em em a, Mizoram ngei pawhin nasa takin hma a sawn a, Serchhip district phei chu hmasawnna hmel hmu nasa leh India ram pum huap pawha ziak leh chhiara hmasawn berte zinga mi ah a chhuak ta hial  a ni a ti a. Tun hnai maia district chhunga hmasawnna thar hrang hrang hmuh theihte a tarlang zui a ni.

Kum kalta chhungin mipuite himna leh dan kengkawhtu Police Department ten case 83 an ziaklut a, an zinga 68 chu charge sheet in 25 convict tawh an ni a, pending hi 14 a la awm mek a ni. Kan Police te inpekna avangin kum 2018 atang tawh khan case tihtawp lailawk (acquittal case) vawi khatmah Serchhip district ah a la awm lo. Tin, covid19 kaihhnawih himna dan lekkawhna chi hrang hrangah fak tlakin Police ten hna an thawk a, drugs leh ruihhlo dangte tam tak an man a ni. Hriselna hi mihring rohlu a ni a, khua leh tuite hriselna hi hmasawnna bulthut a ni bawk a. Kum kalta chhungin district chhungah naupiang report hi 952 a awm a, an zinga 12 hi an boral a, Infant mortality report hi 12.6 a ni. Covid19 dona ah home quarantine mi 1214, Govt. facility ah 2342 leh community quarantine center a khung mi 208 kan nei tawh a. Rapid Antibody Test 567, Rapid Antigen Test 2399, rT-PCR 1127 leh  TrueNAT tests 2295  nei tawhin, an zinga mi 178 ten Covid19 an kaia,  vanduaithlak takin mi 1 a boral a ni, tiin covid19 district dinhmun a tarlang a. Covid19 dona kawnga tha thawhtu zawng zawng chungah lawmthu sawiin, an thawhrimna zarah covid19 case pawh a tlemin dinhmun tha takah kan ding a ni, a ti. Covid19 vaccine covishield dose 450 lai district chhunga frontline workers te pek an nih thu a tarlang a, covid19 dona beihpui thlak a la tawp lova theihtawp chhuaha kan beih zel a tul tak zet a ni a ti bawk.

Heng bakah hian khuallian hian district chhunga sawrkarin hmasawnna hna a thawh hrang hrangte a tarlang a, Fai intihsiakna (Swachhta Ranking) a tithate hnenah lawmman hlanna a nei bawk a ni. Lawmman dawngtute chu: Bazar fai berah Chhiahtlang Bazar, Hotel fai berah KH Hotel, Serchhip Bazar, Hospital fai ber Mercy Hospital, New Serchhip, Restaurant fai ber Om Om Cafe, School fai ber PCR H/S, Office fai ber PHE Serchhip WATSAN Division Office leh VC fai ber Chhiahtlang North VC te an ni. Tin, faina lama inpe mi pahnih chawimawina pek an ni a chung mite chu Pu R. Kapzauva, New Serchhip North leh Pi Lalrinmawii, Chanmary te an ni.

Kumin Republic day lawmnaah hian kum danga buatsaih thin ‘At Home’ buatsaih a ni lova, a lawmna inkhawma telte tan DC office chuan ei tur tuihnai tak a buatsaih sak a ni.