No.6325/2020-2021

Aizawl, 22nd October, 2020 : Vawiin khan Mizoram chhunga School Education Office leh zirna inah te ‘Jan Adolan Campaign on Covid-19’ neih a ni a, thawktute leh zirlaiten Covid-19 laka invenna thu an tiam.

Vawiin chawhma dar 10:30 khan Govt Mizo High School Field-ah School Education Complex office hrang hranga thawkte chuan Jan Adolan Campaign hi an hmang a, Covid-19 laka invena thutiam an nei. Jan Adolan Campaign chu sorkar laipui programme a ni a, October ni 8,2020 khan Prime Minister Narendra Modi chuan a hawng a, state tinah campaign hi kalpui tan a ni.

State Nodal Officer Pu C.Lalthanzira kaihhruai Campaign hawnna inkhawmah hian Pu Lalhmachhuana, State Project Director, Samagra Shiksha chuan thusawiin Covid-19 hian min kiansan mai dawn lova, tumah a inkhung reng theih loh, amaherawhchu, he hri laka invenna hi kalpui reng theih a ni thung a. Midang nena inkar hlata awm a, kut sil thianghlim reng a, hmai tuam that reng hi thil harsa ni lem lo, nunpui theih a ni a, Covid-19 laka inveng chungin nunphung tharin khawsak thiam a pawimawh a ni a ti. Govt Mizo High School Field-ah hian Samagra Shiskha State leh District Project Office-a thawktute, DEO-a thawkte, SDEO East, West, South-a thawktute leh BRC-a thawkte an tel a ni. Jan Adolan Campaign hi School Education Directorate-ah leh District tinah te pawh neih a ni a, DEO te chu District Nodal Officer an nih angin a theih ang angin School-ah te pawh Campaign hi vawiin chawhma khan neih a ni a, School hrang hrangah zirlaite leh zirtirtuten Covid-19 laka invenna thutiam an sawi rual a ni.

Vawiina Jan Adolan campaign neih bakah hian School Education Department chuan Covid-19 laka invenna hi a kalpui zel dawn a, hmalakna tur chi hrang hrangte pawh a siam a ni.