No.6324/2020-2021

Aizawl, 22.10.2020: Sawrkar laipuia Ministry of Home Affairs atangin Joint Secretary (North East) Pu Satyendra Garg chuan vawiin khan Chief Minister Pu Zoramthanga chu a chenna CM Bungalow-ah hmu in, Mizoram leh Assam ramri inkara innghirnghona awm chinfel chungchanga hmalakna an sawi dun.

Pu Satyendra Garg hian nimin a Silchar-a Mizoram leh Assam sawrkar aiawh te inbiakna chungchang Chief Minister hnenah hian hrilhin, he an inbiaknaah hian Mizorama rawn lut tur lirthei a pangngaia a tlang theih chu ngaih pawimawh hmasak a nih angin tihhlawhtlin a nih thu a hrilh a. Sawrkar laipui chuan state pahnih inkar boruak muanawm tak awm a duh thu sawi bawkin, ramri chungchanga inhmuhthiamlohna awm pawh chu state pahnihte tana pawm awm tur inremna siam a nih thuai a beisei thu a sawi a ni.

Chief Minister Pu Zoramthanga chuan Assam leh Mizoram inkar ramri buai avanga innghirnghona chu a reh thuai a duh thu leh boruak tha zawk a awm theih nan theihtawp Mizoramin a chhuah thu a hrilh a. Hetihrual hian Tripura nen kan inrina chungchangah erawh harsatna a awm loh thu Chief Minister chuan Pu Satyendra Garg hi hrilhin, ani pawhin a hriatpui thu a sawi.

Joint Secretary (North East) Pu Satyendra Garg hian Chief Minister a hmuh bakah hian Governor a hmu bawk a. Vawiin chawhnu kha Chief Secretary Pu Lalnunmawia Chuaungo nen an inkawm bakah ramri a thil thleng chungchangah hian NGO Coordination Committee te nen Chief Secretary Conference Hall-ah an thukhawm bawk a ni.