687/2026-2027

Dateh Siaha 25^th May 2026: PM JANMAN leh DA-JGUA hnuaia buatsaih Jan Bhagidaari IEC Campaign “Sabse Door, Sabse Pehle” chu Siaha District ah May Ni 18 atanga Ni 25 2026 thleng District Administration, Siaha enkawlna hnuaiah hlawhtling taka kalpui a ni a. He campaign hi Ministry of Tribal Affairs, Government of India thupek anga kalpui a ni. 

Campaign thil tum ber chu hmun kilkhawr ber thlenga chengte chu sawrkar atanga hamthatna scheme hrang hrang hriattir a, an chanvo dik tak an chan theih nana tanpui a ni. Campaign hi Siaha RD Block leh Tipa RD Block huamchhunga khaw 27 ah kalpui a ni a, IEC campaign hmun 12 ah buatsaih niin ASK Centre 27 ruahman a ni. IEC Campaign, Jan Sunwai programme, Benefit Saturation & Health Camp, leh Transect Walk te DAJGUA gap village-ah neih a ni bawk. He campaignah hian mipui 2,830 vel an tel a ni.

VC, SHG, ASHA Worker, Anganwadi Worker, NGO, kohhran hruaitute, thalai pawl leh khawtlang mipuite an tel tha hle a. hriattur pawimawh hrang hrang PM JANMAN , Ayushman Bharat, Aadhaar service, ration card  leh sawrkar scheme dangte chu flyer, poster leh tawngkaa hrilhfiahin hrilhhriat an ni. Jan Sunwai  hun buatsaih chuan official-te leh mipuite inpawhna tur kawng tha tak siamin hriselna kawng, kawngpui, tui thianghlim, zirna, eizawnna, leh hmasawnna ruhrel chungchangah mipuiten an mamawh leh duhthusam an thlen thei a ni. Transect Walk chu official-te, khawtlang hruaitute leh mipuite tangrualin neih a ni. ASK hmun hrang hrangah lungawilohna thlenna tur (help desk)  leh facilitation counter din a ni bawk a. Mipuite harsatna chu department kaihhnawihah rang taka thlen theiha buatsaih a ni.

Closing-cum-Debriefing Programme chu May Ni 25 2026 khan DC Conference Room, Siaha ah neih a ni a. Deputy Commissioner, Siaha in a kaihruai a, line department hotute leh chanchinbumite an tel. Campaign kalpui dan bakah an harsatna tawh te  leh hmun kilkhawr ber thlenga sawrkar inrelbawlna tihchak zel dan tur ngaihtuahho a ni. District Administration chuan department zawng zawng, frontline worker-te, pawl hrang hrang, khawtlang hruaitute, volunteer-te leh mipuite thawhpuina tha avanga campaign hlawhtling taka a kal thei chu lawmthu a sawi a ni.