2891/2025-2026

Dated Serchhip, the 13th January, 2025: Serchhip khawpui chhungah January 15, 2026 (Ningani) hian Mock Drill neih a ni dawn a. Hemi chungchanga hun hman dan tur hi vawiin khan Serchhip DC Pu Paul L Khuma hoin Serchhip DC Pisapui Hall ah thuneituten an rel.

DC Pu Paul L Khuma chuan lirnghing a lo thlen thulha chhiatna thleng kan hmachhawn dan tur inzirna Earthquake Mock Exercise hi Mizoram pumah neih a ni dawn a, Serchhipah pawh hei hi hman tur a nih dawn avangin he nunchan zirnaa mawhphurtute zawng zawngin theihtawp chhuah turin a ngen a. Lirnghing a lo thlena chhiatna chi hrang hrang thleng thei te zir a nih dawn avangin, a mawhphurtute mai bakah mipui mimir tan pawha tangkai a nih ngei a beisei thu a sawi.

January 15 ah hian mock exercise hi chhun leh zanah neih a ni dawn a. A hmasa zawk hi chawhma dar 10 ah tanin hmun hnih - Serchhip Bazar leh Serchhip Government Higher Secondary School ah te lirnghing avanga building chim, kangmei chhuak, electric leh inbiakpawhna line chhiate a thleng anga. Chawhnu dar 1 ah exercise neih zawh hnuah thlirletna hun (debriefing) chu DC Office ah neih a ni ang.

A vawihnihna hi tlai dar 4:40 ah tan a ni anga. P&E Venga Pu Malsawmtluanga in chim anga chan tur a ni ang. A vawihnihnaah hian mock exercise neihna veng P&E Veng leh a chhehvel hmun thenkhatah P&E Department chuan minute 5 atanga minute 10 bawr vel electric power an titawp (cut) dawn a ni.

Thutkhawmah hian mawhphurhna hrang hrang insiamrem leh inruat a ni a. Hmalak dan tur leh tihtur te inhrilhhriat a ni a. January 14, 2026 (Nilaini) hian chhiatna thlenna tur hmuna chetla tur leh nunchan zir turte chu chiang leh zuala an tihtur te inzirtirna hun an hmang dawn bawk a ni.

Vawiin meeting ah hian District Administration hotute, department hrang hrang hotute, Assam Rifle, BSF, YMA, MUP, mock exercise neihna tur hmun VCP te leh Bazara sumdawng aiawhte an tel a ni.