2890/2025-2026

Champhai, dated 13th January 2026: Excise & Narcotics Minister Pu Lalnghinglova Hmar chuan vawiin khan DC Conference Hall, Keifangtlangah Champhai sawrkar leh khawtlang hotute nen ruihhlo do chungchang an sawiho a, Champhai Bawrhsap Pu Mohammad Aaquib chuan meeting a kaihruai.

He hunah hian Champhai SP Pu Lokeshwaran R chuan Champhai Police ruihhlo do kawnga an hnathawh hrang hrang a sawi a, Excise & Narcotics Asst. Commissioner Pu C. Thangchuanga'n an department hnathawh a tarlang bawk. Heng bakah hian Assam Rifles, Social Welfare leh YMA lamin an hmalakna an sawi bawk.

Minister Pu Lalnghinglova Hmar chuan Champhaia ruihhlo dona a thain a fakawm a ti hle a, an hnathawh tha chhunzawm zel turin a fuih a. Border district a nihna angin ruihhlo lut leh chhuak a tam bik a, Mizo mipuite ruihhlo in a tihbuai loh nan Champhai district hian chanvo lian tak a nei tih a sawi. Khawtlangah mipui, a bikin naupang leh thalai zingah kohhran te, khawtlang te leh sawrkarin ruihhlo ti lo turin au chhuahpui nasa zual turin a chah bawk a, sikul tinah awareness campaign tun kum chhungin vawi khat tal buatsaih theih ni se a ti bawk. Khawtlang hruaitu leh sawrkar hotute inkarah thawhhona tha awm se a tih thu a sawi bawk a, ruihhlo do kawngah Champhai district a tul ang zelin sawrkarin a pui ang tih a sawi bawk a ni.

Champhai Police hian kum 2025 chhung khan NDPS Act hnuaiah case 149 an ziaklut a, mi 260 an man. Heroin kg 38.477, methamphetamine kg 622.4, crystal meth kg 5.169, caffeine kg 3,000, alprazolam kg 4.470 leh corex gram 1.6 an man bawk. Ruihhlo man runpui Operation Jericho an kalpui bawk a, nikum khan Phase I a zo a, mi 52 manin motor 17 an man a, heroin kg 9.235, methamphetamine kg 74.852 leh BEDC litre 565 an man a, tun thla January atanga tunkum March thleng hian Phase II an kalpui bawk ang. Excise & Narcotics, Champhai chuan kum 2025 chhungin MLP Act hnuaiah mi 183 an man a, NDPS Act hnuaiah mi 132 an man baw. Heroin kg 14.577, methamphetamine kg 125.065, BEDC litre 2,733.100 leh country liquor litre 884.800 an man a, drug awareness campaign vawi 15 an kalpui bawk.