Mizoram Youth Commission hmalaknain IAS Coaching Centre chu Aizawlah January 16, 2016 hian hawn tum a ni.

Mizo thalai lehkhathiam tak tak, IAS nimai thei tura beiseiawm, Delhi leh State danga sum tam tham tak sen a ngaih avanga Coaching Centre thaa kal thei velote tan Mizoram sawrkar chuan Coaching Centre tha hawn tul a ti a. Mizoram Youth Commission chu he mawhphurhna hi pe in an bawhzui a. India rama Coaching Centre tha ber te zinga mi Alternative Learning Systems (ALS), New Delhi nen inberemin January 16, 2016 hian Class neih tan tum a ni ta a, a hawnna programme erawh January ni 19 ah neih a ni ang. Class hi Satellite kaltlanga lak a ni dawn a. Delhi a class an lak rualin VSAT hmangin Mizoramah Class an la ang a. Zawhna pawh Delhi atanga an zawh kha Mizoram atangin VSAT kaltlang hian student ten an zawtin an chhang theih dawn a ni. Lehkhabu tha pawh Delhi leh hmun dang atangin Mizorama lei mai theih turin an chahsak dawn a ni.

MYC Chairman Pu T.Sangkunga chuan vawiin khan IAS Coaching Centre hawnna tur hmun atana ruahman Dinthar Primary School I a tlawh a. He hmun hi a tha tawk em tih en tura lokal ALS a an Service Engineer bakah MYC Secretary, official dangte leh Dinthar khawtlang hruaituten an tawiawm. Coaching hawnna tur hian hmun hrang hrang enkual a nih hnuah Dinthar Primary School I building hi a remchang bera ngaih a ni a, Education Minister leh Parliamentary Secretary biak niin an ni hian a thuphungin an remtihsak a. Phalna erawh Education Department hnenah dil leh tur a ni.

January 16, 2016 ah class hi tan tur a nih avangin dil duh tan dilna hun hi 17.12.2015 thleng pawhsei a ni a. Screening test hi 21.12.2015 ah neih a ni ang.