Kum dang ang bawkin kumin pawh hian Home-hrang hrang te, Nau hnuchham in te leh tanpui ngaite chu Chief Minister's Discretionary Fund kaltlangin tanpuina pek an ni a. Vawiin khan he tanpuina hi Kolasib District-a Home hrang hrang 7, Civil Hospital leh District Jail te hnenah Kolasib DC Pu H. Lalengmawia, IAS chuan DC Conference Room-ah ah hlan a ni.

Pu H. Lalengmawia chuan Chief Minister's Discretionary Fund kaltlanga tanpuina pek hi tam loh mahse khawngaihna, hmangaihna leh lainatna rilrua pek a ni a, Sawrkar leh Chief Minister atanga hetiang remruatna awm hi a lawmawmin a ropui hle a ni, a ti a. He tanpuina hi thawhhona leh inpawhna tha zawk hmanrua nise tiin mimal ang pawha Krismas hunlaia Home leh tanpui ngaite tanpui duhna rilru lamah kan thanharh a ngaih thu a sawi bawk.

Vawiina tanpuina dawngtu te hi Kolasib atangin Enna In, Audrene Scism Children Home, Civil Hospital, District Jail, Charity Home, Gosen Special School, School for Blind leh Omega Centre, Zophai Bairabi te an ni. He hunah hian an home dinhmun te tarlangin an harsatna te an sawi bawk a ni.

He programme hi Addl. DC Pu R. Lalremsanga chuan a kaihruai a, Kolasib SP Pu C. Lalzahngoa, Pi Maria CT Zuali, Director SIRD leh Head of Office thenkhat ten he hun hi an hmanpui bawk a ni. He huna lawmthu sawitu Pu C.T.Mawia, President YMA Sub-Headquarters Kolasib chuan Home te hnenah hian Digital Cable TV connection a thlawna a pek tur thu a sawi a ni.