Mipui te hnena bank hman tangkai dan inzirtirna tura hmalakna Financial Literacy Centre (FLC) leh Financial Literacy Mobile Van (FLMV) Mizoram Cooperative Apex Bank Ltd. (MCAB) ten an buatsaih chu vawiin chawhma dar 11:00 khan Finance Minister Pu Lalsawta’n Aijal Club ah a hawng.

Minister chuan hawnna thu sawiin MCAB ten nasa taka hma an sawn chho chu lawmawm tiin anmahni enkawltu Board hotute fel vanga Mizoram Sawrkar pawh an inenkawlna ah a inrawlh vak loh thu a sawi lang a. Tuna an hmalakna thar ah NABARD-in suma a tanpuina chu tanpui tlaka an thawh vang a ni, a ti. Sum enkawlna kawngah leh bank chhawr tangkai kawngah mipuiin kan hriatchian loh tam tak la awmte inhrilhfiah nana, Mizoram hmun kilkhawr lai te thleng phak tura Financial Literacy Centre leh Financial Literacy Mobile Van te MCAB-in an ruahman chu lawmawm tiin Zoram mipui ten an chhawr tangkai a beisei thu a tarlang bawk. Mizo mipui te chuan cooperative society zawnga tanghova hmalak kan la uar tawk lo tiin nasa zawka uar chhoh zel a pawimawh thu te sawiin Minister chuan NABARD leh Apex Bank te hmangin kan tharchhuah te pawh nasa takin a tihpun theih dawn a ni, a ti bawk.

Financial Literacy Centre (FLC) hi India Sawrkarin ram chhunga cheng mipui zawng zawng ten bank an chhawr tangkai theihna tura account an neih vekna tur leh Sawrkar atanga hamthatna engpawh beneficiary-in direct-in account ah a lo dawn nghal zel theihna tura hmalakna ‘Financial Inclusion’ programme hnuaia mi a ni. FLC hi District headquarters tinah pakhat theuh leh Aizawl ah pahnih dah a ni dawn a, FLC 9 mamawh tur sum leh thawktute hlawh bakah FLC senso dangte hi NABARD hian a tum vek dawn bawk. FLC-a thawkte hian mipui nawlpui Bank Account la nei lo te chu account neih theih dan leh Bank dawr dan Zoram dung leh vangah zirtirna pe-in an zin thin dawn a ni.

Financial Literacy Mobile van hmang hian Mizoram dung leh vangah, a bikin Bank Branch awm lohna khuaa cheng mipuite chu PMJDY Scheme etc. angin Bank account hawn dan tur leh ATM hman dan tur te an khuaah ngei zirtirna pek thin a ni dawn a, he motor hian hmun kilkhawr tak tak a tlawh thin dawn a ni. He Van ah hian ATM dah a ni ang a, Bank branch ang chiahin a tlawhpawh hmun leh khuaa chengte chuan account hawngin pawisa pawh deposit nghal mai theihna a ni. Bank account nei mek, a bikin Basic Savings Account holders te hnenah PMJJBY & PMSBY Insurance Policy te pawh hrilhfiah leh enrolment tih nghal mai dan mipuite zirtir thin an ni dawn bawk a ni.

Vawiina FLC leh FLMV hawnna hi Pi T.Lalmuanpuii, Chairman, MCAB-in a kaihruai a, MCAB hmalakna hrang hrang te sawiin Mizoram Sawrkar leh NABARD atanga duhsakna an dawnna ah te lawmthu a sawi. Pu S.Sankaranarayan, Dy. General Manager, NABARD leh Pu Dilip Kumar Mishra , General Manager, NABARD te pawhin NABARD hnathawh dan leh hmalakna te an sawifiah bawk.