3091/2024-2025

Aizawl, Nov 19th, 2024: Vawiin khan Aizawl DC Conference Hall-ah Aizawl DC Er. Lalhriatpuia kaihhruaiin Aizawl District Consumer Protection Council Meeting neih a ni a, Aizawl khawpui chhunga LPG Home delivery chungchang sawiho a ni.

He meeting-ah hian Sorkar ruahman anga eirawngbawlna gas chu home delivery kalpui chhoh mek zel dan sawihovin, Gas Agency hrang hrang te hmalak dan leh an dinhmun sawiho a ni a. Aizawl khawpui chhung veng hrang hranga Fully leh Partially a LPG Home Delivery kalpuina hmun te enho niin, Zothan Indane - Agency chuan an huamchhung veng tin 100% in Home Delivery an kalpui vek tawh thu vawiin hian report a ni.

AMC area huamchhunga Distributor tin chuan kum 2025 January thla atang chuan an area chhungah tuna Home Delivery an kalpui mekna bakah veng dang pahnih theuhvah home delivery an kalpui belh leh ngei tur a ni tiin, an kalpuina belhna tur veng pahnih theuh thlan tir an ni. Home Delivery la kalpui lohna veng a awmte tan pawhin home delivery an book thei a, an lo book a nih chuan Gas Agency ten an pe ngei ngei tur a ni.

Hmalakna vil zui turin meeting-ah hian Addl DC Pi P.C Zonuntluangi kaihruai Monitoring Committee din nghal a ni a. He Committee peng hian Gas Agency hrang hrang ten Home Delivery an kalpui dan a tul angin an endik thin ang.

Vawiin meeting ah hian Aizawl khawpui chhunga LPG Gas Agent hrang hrang te telin, IOCL (Indian Oil Corporation Ltd.) aiawh te, MCU (Mizoram Consumer Union) leh CYMA aiawh te bakah Aizawl DC leh FCS&CA Department official te an tel a ni.