3090/2024-2025

Aizawl the 19th November, 2024 : Vawiin hi khawvel pum huapa United Nations in a kalpui thin, World Toilet Day (Khawvel Ek In Ni) a ni a, he ni pual hian PHE Department leh Central YMA tangkawpin Tourist Lodge, Chaltlangah hun hman niin PHED Minister Prof. Lalnilawma chuan he hun hi a hmanpui a ni.

United Nations General Assembly chuan kum 2013 Sahmulphah Thla ni 19 hi 'Khawvel Ek In Ni' atan a lo puang ta a, hemi kum atang hian kumtin khawvel pum huapin thupui thlan bik neiin hman a lo ni ta a ni. He ni hi khawvel invawn thianghlimna lama hun khirh thleng chho mek hmachhawn tura mipui chawk phur thar tura inzirtir leh inhrilhhriatna hunah hman thin a ni.

Khuallian Prof. Lalnilawma, PHED Minister ni bawk chuan 'Kan hriselna leh kan changkanna hi kan ek inte nen a inkaihhnawih vek tih he ni pual hian mipuiten hre thar sela, sawrkar laipuiin kum 1986 atanga a lo kalpui tawh ramchhunga faina programme- ah a rawn tinbing ber chu ek in a ni a, kan inthiar dan leh kan ek dehral dante hian kan ei leh in zawng zawng bakah kan hriselna chena a kaihhnawih vek vang hian kan ngaih thutak a hun tawh takzet a. Fai leh thianghlimna kawngah hian sawrkar tha chakna chauh a tawk lova, mimal tinten mawhphurhna kan neih theuh vang hian he ni kan hman hian mimal tin nunah faina lama hma kan sawn theih nan tha zawkin hna thawk se a duhawm takzet' tih a sawi a ni.

World Toilet Day denchhen hian sawrkar laipui chuan rampum huapin December ni 10 thleng hian campaign kalpui turin ruahmanna a siam a, mimal ieh vantlang inthiarna thawmthat leh cheibawl hnate thawkin, ek in him tha pawimawhna uar zawka inzirtirna hun atana he campaign hi hman tum a ni.

World Toilet Day inkhawmah hian PHED Secretary Er. Lalrinkima Hnamte chuan palai lawmna thu sawiin, Er. H.Duhkima, Director, PMU PHED chuan thupui sawi zauna hun a hmang a, Er. Lalrothanga, Engineer-in-Chief, PHED leh Dr. Malsawmliana, General Secretary, CYMA te pawn thusawina hun neiin, PHED officers leh staff-te bakah khawpui chhung YMA Branch hrang hrang hruaituten he hun hi an hmanpui a ni.