2457/2022-2023
Aizawl the 27th October 2022 : Vawiin khan Verdant Multipurpose Hall, Laipuitlang ah Labour, Employment, Skill Development & Entrepreneurship Department buatsaihin Japan rama Nursing hna Mizo thalai ten kan thawh theihna turin Workshop buatsaih a ni.

Workshop hi Pu T.Thangropianga Jt. Director, LESDE Department in a kaihruai a, Pi Angela Zothanpuii, Director, LESDE Department chuan thusawiin, ‘Mizo Thalaite ram danga hna thawk tura mamawhna a san zia leh Mizo te thiam thil kan neih that zia sawiin ram changkang Japan-a hnathawhna him leh rintlak taka thawh theihna turin Japan sawrkar leh India sawrkar-in inremna thuthlung an ziak chu lawmawm a tih thu’, a sawi a ni.

Pu Masot Zimik, State Engagement Officer, National Skill Development Corporation (NSDC) chuan inremna ziah chungchang leh hamthatna hrang hrang te a sawi a, North East miin nasa takin theihna an neih thu a sawi tel bawk. Pu Anshul Singhal, Manager, National Skill Development Corporation International (NSDCI) hnen atangin, “Opportunities in Japan as Nursing Care” tih thupui hmangin Power Point Presentation pe a, a kal dan tur te, a hna kalpui dan te leh Japan kal tur a thiam thil neih ngaite a sawifiah a, heng a thusawi te hi Mizo tawngin Pi Jordanthangi, Employment Officer, LESDE Department in a sawifiah a ni.

He hunah hian Mission Foundation Movement School of Nursing, Blessino Nursing School, BN College of Nursing leh School of Nursing, Thingdawl atang te in Nurse zirlai mi 100 vel an tel thei a, Zirlai leh Zirtirtu ten zawhna leh chhanna hun hlawkthlak tak an hmang thei bawk a ni