Health & Family Welfare Department chuan tunhnaia Churchandpur District, Manipur a Japanese Encephalatis (JE) hri leng mek, Kolkata-a Dengue leng mek leh Nagaland epa Myanmar ramah sentut naupangten an vei mekte chu ngaipawimawhin heng hri lakah mipuite an him theih nan leh heng hri te hi Mizorama a darh loh nan Integrated Disease Surveillance Programme (ISDP) chu inring renga, a tul thulha chak taka hma lak anih theih nan ruahmanna duang sa turin hriattirna a chhuah a ni.
Japanese Encephalitis (JE) chungchangah hian Health & Family Welfare Department chuan Mizoram leh Manipur ramri hrula khua – Sakawrdai, Vaitin leh Zohmun ah te he hri a len thut thua pawh chak leh rang taka hmalak a nih thei nan leh mipuite hrilhhre turin mithiam panga telna ISDP Team, Dr. Pachuau Lalmalsawma, State Nodal Officer, IDSP kaihhruai chu vawiin khan a tir chhuak a. Anni hian heng khua ah te hian vantlang inkhawm neiin mipuite awareness an pe dawn a, heng khua ah te field visit leh Free Clinic an nei dawn a, Space Spray (Fogging) te an ti bawk dawn a ni.
Nagaland ep Myanmar rama khaw thenkhatah tunhnaia sentut ang naupang ten an vei mek leh naupang engemawzatin nunna an chan phah chu Health & Family Welfare Department-in ngaihthah chi a ngai lovin Myanmar ramri hrula awm CHC leh PHC te chu fimkhur tura chahin natna dangdai engemaw an hmuh palh thut thuah rang takin hotu sang zawk leh IDSP te hrilh leh hriattir turin an chah.
Dengue chungchangah chuan he natna hrik pai leh pai lo enna khawl leh a enkawlna chu Aizawl Civil Hospital leh Lunglei Civil Hospital ah te hian a awmsa a, hengte hi Sentinel Survelliance Site tih an ni a. CHC leh PHC te chu khawsik dangdai deuh nia an rinte chu heng hmunah te hian an thisen sample thawn vat tur a hrilh tawh an ni a. Tun thleng hian dengue nia rin thisen sample 50 an test tawh a, chung zinga 49 te chu negative niin February thla khan pakhat chauh positive hmuh a ni a, hei hi a dam tawh a ni. Nikum khan malaria vanga boral chu mi 21 an ni a, tun thla thlenga malaria vanga boral chu mi 4 chauh an la ni.
Heng hri lakah Mizoram a him theih nan leh heng hri a darh loh nan Health & Family Department chuan theihtawp chhuahin a theih ang angin hma an la mek a, tun dinhmunah chuan heng hri – JE, dengue leh sentut (Myanmar ramah leng ang) te hi vei tumah hmuchhuah a ni lova, mipui te chiai lo turin a ngen a ni.
