Vawiin khan Health Commissioner Pu Lalrinliana Fanai hoin a office chamberah Special Committee to Implement Article 5.3 of WHO Framework Convention on Tobacco Control chu a vawikhatna atan an thukhawm.

Committee ah hian WHO Framework Article 5.3 in mihringte hriselna dah pawimawh hmasak ber a tul thu leh vaihlo leh kaihhnawih atanga fihlim a, mitinte, abik takin sorkar officialte vaihlo siamtu companyte lakah inthiarfihlim a pawimawh thu tarlan a ni a. A kalpuina tura inkaihhruaina engemawzah awmte sawiho a ni.

Meetingah hian Vaihlo siamtu company ten Mizoramah hmalak an tum dan hrang hrangte report ngaihthlak a ni a. Mizoram sorkarin Gutkha zawrh leh hralh a khap avanga ‘Smokeless Tobacco Federation (India) hotupa kum 2012 Mizoram rawn kalin Mizoram sorkar chu courta khinah a rawn vau thu te, Gauhati High Courta Public Interest Litigation(PIL) thehluh anih thute, Mizoram sorkarin vaihlo chhiah 30% a tihsan chungchanga vaihlo siamtuten an lungawiloh thu an sawi te, dan kalha sikret Mizorama lolut man theihna dan september 2015 a siam anih thute tarlan a ni a. Vawiin thlenga hetiang sikret man zat chu 10,568 cartons niin, cheng nuai 31.7 hu a tling a ni. COPTA dan hnuaiah kum 2008 - 2016 July thlenga dan bawhchhia man zat chu mi 6401 niin, an pawisa chawizat pawh Rs.3,13,177/- a tling tih tarlan ani bawk.

Meeting chuan Article 5.3 Notification hi official zawng zawngte hriattir nise a ti a. India sikret siam leh ramdang siamte dahkhawlna leh zawrhna hmunte chhinchhiah a, a map siamte thil tih tur langsar zual awm te an nih thu meetingah hian sawilan a ni bawk.

Meetingah hian Mizoram State Nodal Officer Dr.Jane R.Ralte in WHO Framework Article 5.3 hrihfiahin report a pe bawk a ni. Special Committeeah hian member 11 awmin, Pi Lal Riliani, President, Indian society on Tabacco & Health, Mizoram Chapter chu mi sawmbik a ni.