Vawiin chawhnu dar 1-ah khan Aizawl Chaltlang-a SSA Aizawl District Training Hall-ah CSS Hindi Teacher te tana chawlhkar hnih awh tur Orientation Training Programme vawi 140-na chu Pu K. Lalrintluanga, Additional Director, School Education chuan a hawng. He programme hi Central Hindi Institute, Regional Centre Shillong bul tuma neih a ni a, Dr. Rajveer Singh, Central Hindi Institute, Agra leh, Sri Alok Singh, Guest Lecturer, CIH Shillong Centre ten an hmanpui.

Pu K. Lalrintluanga chuan naupangten tunah Hindi hrethiam vek lo mahse, Hindi thiam tumna tak tak nei tura zirtir zel turin Trainees te a duh thu a sawi a. Hindi Teacher te pawh mahni inzir zel tura fuihin an zirlaite hnena Hindi thiam chakna neihtir thin turin a chah a ni. Guest of Honour, Pi H. Dengkimi, Principal, Mizoram Hindi Training College pawhin thu sawiin, Hindi tawng zirna chungchanga tan lak a ngaih thu leh, training programme chu hlawk taka an hman ngei a beisei thu a sawi bawk.

Training programme hman mek hi Aizawl South huamchhunga CSS Hindi Teacher te tana buatsaih a ni a, Teacher 29 an tel a, Thla hmasa khan Aizawl West area CSS Hindi Teacher te tan training buatsaih a lo ni tawh bawk a ni.