Pi Laldingliani leh a faten an pa kum 2007 a boralta Pu J C Chana (L) hriatreng nana an din M/s JC Security Guard & Labour Supply Agency training chu vawiin khan Pu Lal Thanzara, Minister of Health & Family Welfare Deptt. etc chuan Electric Veng YMA Hall-ah a hawng. He hun ah hian Professor Zokaitluangi, Dean, School of Social Sciences, MZU chu khualzahawm a ni a. Thalai 300 rual training lai mek leh zo tawh an awm an ni.
JC Security pian chhuahna Pu JC Challiana nupui tu leh fa ten thalai rual engemaw zat tana eizawnna tling tur training an buatsaih leh rukru leh misual te laka venghimtu Security rual an chher puitlinna chu faka a lawmawmzia sawiin khuallian Pu Lal Thanzara chuan sum leh pai leh thildanga lo puibawmtu North East Rural Livelihood Project ( NERLP ) te hnenah lawmthu a sawi bawk a ni.
Kan khawvel hi chhe chho mekin Terrorist, rukru leh misual ten remchang chuhin pawi sawilo te thlengin an khawih thin, Mizoramah ngei pawh hetiang hi kan tawng chho mek a ni tiin Pu Lal Thanzara chuan ram mipui te venhimna tur kawngah Sorkar hi a indaih reng lo, chutih lai hunah lo tanpui thei tura JC Security Guard siam a ni chu a thlamuanthlak in a lawmawm hle a ni, a ti a.
JC Security Guard te chu fuih in Minister chuan miten anmahni ah rinna an nghat a, anmahni sahimna bakah an thil neih rohlu te veng him tura an ngaih ang ngeia thawka inpezo tur leh an duty leh hriselna tibuai theitu hrang hrang ruihtheih thil te thlenga in venghim zo turin a chah. Sorkar tana tih ve tul leh tih ngai a awm anih chuan sawi hreh lo tura chah in Pu Lal Thanzara chuan JC Security Guard Traininga thawktu te chu tluang taka an kal zel nan Training hawngin duhsakna a hlan a ni.
Vawiin programme ah hian khual zahawm Prof. Zokaitluangi, Dean, School of Social Sciences, MZU pawhin thu a sawi a. Pu JC Challiana fapa Pu JC Sengluaia, Director JC Security & Labour Supply Agency in JC Security Guard chungchang a sawifiah a. Pu Reuben Ranglong, District Project Manager, DPMU, Aizawl, NERLP leh Pu Vanlalsawma, Technical Director, MATA leh midangten thu tha tak tak an sawi a ni.
North East Rural Lifelihood Project (NERLP) sponsorship hnuaia M/s JC Security Guards & Labour Supply Agency hi thingtlang mite tana skill development training buatsaih a ni a. Home Department remtihna in tunah hian Security Guards 300 vel District 8 ah an in zar pharh mek a ni. Security Guard rawih te hi Police training course ang te an training zawh vek hnuah combat fighting an training chhuak leh vek a. Heng training course 2 te paltlang zo chauh te hi hnathawk tura lak an nih thin avangin an security guards chhawrte hi an rintlak em em a ni.
JC Security Guard & labour Supply Agency hi Pi Laldingliani leh a fate chuan an pa JC Chana (L) hriatrengna atan dinin an pa hminga mipuite rawngbawlna atan an hlan a ni.
