Vawiin khan Chief Minister Pu Lal Thanhawla chuan Mizorama Cherry Blossom Avenue hmasa ber tur, New Secretariat (AG Office bul) ah a lungphum phumna programme a hmanpui a, helai hmunah hian Cherry Blossom tiak a phun nghal a. He hmalakna hi Directorate of Science & Technology, Planning Department; Institute of Bioresources & Sustainable Development (IBSD) Imphal leh Department of Environment, Forests & Climate Change te tangkawp buatsaih a ni.

Chief Minister Pu Lal Thanhawla chuan ramngaw leh ramhmul lama Mizoram hausaknate theihtawpa haichhuah chhoh mek leh hman tangkai chhoh mek a nih thu sawiin, he programme pawh hian heng kan hausakna te hman tangkaina kawngah leh a bik takin Eco-tourism lama hmasawnna kawngah Mizoramin ke a penna rahbi pawimawh tak a nih ngei ka beisei a ni, a ti. Tuna thingphun ang programme chu Mizoramin kum 1998 atang khan a bultanna neiin Green Mizoram hnuaiah thing tiak nuai tam tak phun a ni tawh a, he programme ina a tum ber chu mipui te rilru a thing leh ramngaw pawimawhna leh humhalhna tuh a, Mizoram a thing leh mau humhalh a phunbelh a, Mizoram ramngaw siamthat a ni, a ti a. Vawiina kan programme hi chuti zawnga ngaihtuah chuan Green Mizoram nen pawh a inmil hle a ni, a ti bawk.

Pu Lal Thanhawla chuan Mizoram in ramngaw leh thing in a khuh ram 'forest cover' kan nei tha a mahse ngaw pui leh ngaw dur dense forest kan tih ang chu kan ram zau zawng chhutin za zelah 0.65 vel chauh a ni a, chuvangin heng kan ramngaw te hi a lo ngaw belh zel nan Quality Planting Materials leh Village Forests lamah tan lak a pawimawh a ni, a ti a. Tunlai hunah thiamna te a lo sang zel a, zawi zawiin kan lo tihdik loh thinte siamthatna kawngah kan thangharh chhoh a, sawrkar pawhin a policy leh hmasawnna atana ruahmanna hrang hrangah ramngaw siam leh humhalh a telh chho ve ta zelin, tuna Avenue plantation angte pawh hi rampum huapin Green Mizoram programme hnuaiah lo kalpui ve thin a ni a. Science lama mithiamte leh roreltute thawhhona tha tak hnuaia programme awmze nei tak mai leh kan rama thingkung tha duh em em mai ‘Tlaizawng Par' hmang tangkai a, Cherry Blossom Avenue Plantation programme buatsaih a ni hi a lawmawm hle a, a ni a ti bawk.

InstituteofBioresources& Sustainable Development a thawk mithiamte chu Hmarchhak thing leh mau, nungcha tin reng, leh ramhmul lamah hausakna te haichhuaka, a hman tangkaina kawng dap a hengte humhalhturina chah a ni.

Prof. Dinabandhu Sahoo, Director, Institute of Bioresources & Sustainable Development chuan he programme buatsaih a nih chhante sawiin, hetiang ang hun hi Meghalaya leh Manipur-ah te tunhnaiah buatsaih a nih tawh thu a sawi a. Mizoramin sik leh sa dinhmun tha tak, thlai leh thingte that duhna em em mai a neih te hriain, hemi hi hmasawnna atana hman tangkai a nih theih nan he programme hi Mizoramah buatsaih a nih thu a sawi a. India hmarchhak leh Mizorama Eco-Tourism lam chawisanna atan te, nakin zelah Cherry Blossom Festival te pawh buatsaih zui theih a la ni ang a, thalaite tan pawh hna thawh tur tam zawk a la siam theih a rinawm thu a sawi bawk. He hmalakna hi state hotu ber Chief Minister-in a lo phurpui em em avanga lawmthu sawiin, Mizoram hmun dangah te pawh Eco-tourism lama mite hipna atan chhunzawm theih a nih a beisei thu a sawi a ni.