Vawiin chawhnu khan Pu KS Thanga, Parliamentary Secretary chuan Govt. T Romana College-in Academic Research tihna atana an thlan Tachhip khua chu 'Adopted Village' atan a hawng.

He hun puala inkhawm tawi Kaphleia Hall, Tachhip a vantlang inkhawm buatsaih ah Pu KS Thanga chuan Sorkar laipui hmalakna - Unnat Bharat Abhiyan Scheme hnuaia, Govt. Institution-ten Adopted Village nei a, development hna engemaw tal kalpui tura tih an nih ang a Govt. T Romana College ten Tachhip khua an thlang chu lawmawm a tih thu a sawi a. Zirna peng hrang hrang, heng - history, society, polity, economics, education, administration leh literature-ah te research mumal tak nei a an zirchian na tur chuan Tachhip khua chu hmasawnna leh changkanna lamah nasa taka a puih theih ngei ka beisei thu sawiin, a khaw mipui te pawh tha taka tawiawm turin a chah bawk a ni.

He hunah hian Tachhip khawtlang mipui bakah Govt. T Romana College hotute leh researcher-te telin, hun tha tak hman a ni.

Unnat Bharat Abhiyan hi Sorkar laipuia Ministry of Human Resource Development (MHRD) bultum niin, he scheme hnuaiah hian thingtlang khua te tihhmasawn nan zirna in sang zawk Indian Institutes of Technology (IITs), National Institutes of Technology (NITs), Indian Institutes of Science Education & Research (IISERs) leh University hrang hrangte chuan khawtlang mamawh leh harasatna te zirchiang a, tunlai thiamna hman tangkai dan te an ngaihtuahsak dawn a ni.