Vawiin khan Joint Coordination Committee (Japan International Cooperation Agency) chu an chairperson Pi L. Tochhong, Chief Secretary hovin a vawikhatna atan an thu khawm. Minor Irrigation Department leh JICS hmalakna in ‘Study on Development and Management of Land and Water Resources for Sustainable Agriculture in Mizoram’ bul tan a ni a, he Development Study hnuaia hmalak dan tur meeting-ah hian sawiho a ni. He meeting-ah hian Department hrang hrang, Agriculture & Allied Departments, Environment & Forest Department leh Rural Development Department aiawhte an tel a ni.

Japan International Cooperation Agency (JICA) hi Japan sawrkarin ram dang tanpui tur leh hmasawnna lam hna hrang hrang thawk tura din a ni a. He Development Study ti tur hian September ni 28 khan Japan mithiam pali rawn thleng tawhin, office te hawngin hna an thawk tan nghal a, October thla laihawlah hian midang panga an rawn thlen belh leh ang. He Development Study hi thla 20 chhungin thiamna bik hrang hrang nei mi 12 ten hna an rawn thawk ang a, an senso zawng zawng hi Japan sorkar tum tur a ni.

He meeting-ah hian S. Yamaoka, Rural Development Planning Specialist, Leader of JICA Team of Experts ni bawk chuan hmalak dan tur an duanchhuah chu presentation hmangin a hrilhfiah a. JCC Chairman Pi L. Tocchong chuan an ruahmanna chu tha a tih thu leh Mizoram hmasawnna kawng pawimawh tak a nih dawn thu sawiin, Development Study chu a taka hman theih turin a hawng bawk.