Vawiin chawhma dar 11:00 khan Ministry of Textiles, Government of India bul tuma Mizoram Apex Handloom and Handicraft Co-operative Society Ltd –in a buatsaih Handloom Fair hawnna inkhawm chu Lawngtlai Press Club-ah neih a ni a. Lawngtlai District Additional DC Pu. R. Lalsangluaia, MCS, chu khuallian niin he Fair hi a hawng a, Pu K. Saitluanga MIS, District Information and Public Relation Officer chu khual zahawm a ni bawk.

Thusawiin khuallian chuan Lawngtlai District in hetiang ang hun tha a thleng chu lawmawm a tih thu sawiin in tin hian mahni hnamzia rang pho lang thei thuamhnaw engemaw tal kawl kan mamawh a, kut ni vang thla leh Biakin a inthuam nan chenin kan hmang nasa hle a ni. Chung kan mamawh chitin rengte tlawm zawka leina hun tha Lawngtlai District chuan a tawng ta a ni tiin Lawngtlai khawpui a mitinte he hun tha hi hmang tangkai ve ngei turin a chah a ni. Tin, khuallian hian Mizo kutchhuak puan te chu a mawiin khawvel mithmuhah pawh a zahpuiawm loh hle a a hriat thu a sawi rualin tunlai mil zela kutchhuak mawi neih thiam a tul a rin thu a tarlang tel bawk.

Khualzahawm Pu K. Saitluanga, MIS, DIPRO Lawngtlai District pawhin thu sawiin mahni kutkawih ngei hmanga ei zawng theite a ngaihsan thu sawiin Handloom Fair-a mahni siam chhuah ngei puan mawi tak tak phochhuak tute chu a fak a. Ram thenkhatte technology-ah a than chak em avangin hnam tam takte chuan anmahni hnam thil ngei ngei pawh ram dang atanga siam an chaw lut tawh a ni, chutiang laka Mizote min veng theitu chu kan Handloom leh Handicraft Industry te hi an ni tiin inthlahdah hauh lova bei turin a fuih a ni.

He Handloom Fair hawnna inkhawm hi MAHCO Ltd Manager Pu K. Rothawmliana’n a kaihruaia, a ni hian MAHCO Ltd in Fair kumin chhunga a neih tawh dan tlangpui tarlangin Report a pe a, Lawngtlaia Fair neih hma hian Champhai ah leh Saiha khawpuiah Fair 2013 hi lo nei tawhin Lawngtlai hi a pathumna a ni a. Lawngtlai Fair ah hian Aizawl, Thenzawl leh hmun hrang hrang atanga puan tahtu mi 17 ten an thil siam chhuahte an phochhuak a ni.

He Fair hian 9.10.13 Nilaini thleng a awh ang.

Attachment

  • Loading attachment...