Vawiin khan  JCRE Skills Solutions chuan Regency Hotel-ah Convocation an nei a, he hun hi Labour, Employment, Skill Development & Entrepreneurship (LESDE) Minister Pu H Rohluna chuan a hmanpui a ni.

Pu H. Rohluna chuan Mizo-ten talent tam tak kan neih thu leh chumi peipung tur chuan sawrkarin skill development a ngaih pawimawh thu a sawi a. Hemi kawnga nasa taka hma la in Vocational Training Provider ten course hrang hrang thalaite thiamthil zirtira, eizawnna tluantling an neih theih nana tan lak a nih thu a sawi a. Minister chuan Mizoram chhungah chauh nilova ram pawnah te hna thawk thei turin chhawrtlak leh eizawnna tling  tura thiamna neih a tul a ni, a ti a.  Thalaiten lehkhabu tha-te chhiar peihlova thil tullo zawka hun an khawhral thin chu pawi a tih thu sawiin heihi nihtur ang min nih phak loh tirtu min pawthniamtu a ni, a ti a. Eizawnna eng pawhah hlawhtling tur chuan chhel tak leh rinawm taka hna thawha, beih a ngaih thu sawiin training chhuakte chu bul an tan chauh ani tih hriaa mahni zawn theuhah ram leh hnam tana chhawrtlak leh chhungkua tana innghahna tlak ni tura theihtawp chhuah turin a chah a ni.

He hunah hian JCRE Skills Solutions Mentor Pu Vanlalrema Vantawl, MJA President ni bawk chuan keynote address pe in khawvel pumin hna indaihlohna “Unemployment” a buaipui thu leh he harsatna su kiang tur chuan  eizawnna tluantling neih theihna tura skill development a pawimawh thu sawiin sawrkar laipui leh state sawrkar pawhin Skill India hnuaiah hemi kawngah hma a lak mek thu a sawi a. JCRE Skills Solutions kal tlangin Mizo thalaiten skill training an dawng thei chu lawmawm a tih thu sawiin zir chhuakte chu JCRE ti hmingthatu ni zel turin a fuih a ni.

JCRE Skills Solutions Convocation-ah hian Pu L. Niranjan Singh, Director, JCRE Skills Solutions leh Dr. J.T. Vanlalngheta, District Employment Officer Aizawl ten thu an sawi bawk a ni.

JCRE Skills Solutions hian nikum August thla atang khan Luangmual, Aizawl-ah course pali – Beauty & Wellness, Hospitality, Retail leh I.T ah te training an kalpui a. Vawiina an first batch Convocation-ah hian training chhuak mi 59 hnenah certificate an hlan a ni.