Vawiin Ni 31.1.2018 nileng khan Mizoram State Tax Department hnuaia Assisstant Commissioner leh State Tax Officer te chuan Goods and Services Tax (GST) India ram puma hman anih hnua an mahni bial chhunga hmalakna chi hrang hrang sawihoin meeting pawimawh ATI Auditorium ah an nei.

He meeting hi session hnih-ah then niin First Session hi Pu Kailiana Ralte Additional Commissioner of State Tax in a hruai a, Pu LH Rosanga, Commissioner of State Tax chuan thu sawiin Mizoram sawrkar sum lakluhna hnar pawimawh tak khawihtute annih avanga thahnemngai turin a fuih a, GST chu tunlai thiamna sang ber ber hmanga thawh leh enkawl a ngaih avanga anmahni pawh inzir zel tur leh anmahni dawrtute tan pawh a inhawng fo turin a fuih a ni.

Hemi hnu hian sumdawngten chhiah an pek dan, Return an siam dan tur inkawhhmuhna (Presentation) STO thlan chhuah ten an neih leh hnuin sawihona hun hman a ni.

Second Session ah hian sumdawng thenkhat, GST Registration nei, chhiah chhung tha lo leh sumdawng an turnover nuai sawm tling leh GST Registration neih ngai, nei duh si lo te chunga hmalak dan tur leh an harsatna tawhte sawi ho a ni a. Central in India rama State zawng zawngte dinhmun uluk taka a thlir reng avang leh State dang aia Mizoram dinhmun a hniam zawk lohna turin heng dan zawmlo tute dapchhuaha an chungah dan ang taka chak zawk leh na deuh zawka hmala turin an infuih bawk.

Hei bakah hian February Ni 1, 2018 atanga State pawn atanga Mizorama bungrua Rs 50,000.00 aia tam lalut tur ten e-way bill an neih ngei a tul leh tawh dawn avanga harsatna awm thei leh puih ngaite pui thei reng tura inbuatsaih turin an inhrilh bawk a ni.