Vawiin chawhma khan MLA 5 leh Official 6 telna, Ethics & MLA Fund Monitoring Committee, Jharkhand Legislative Assembly ten an chairman Shri S.N. Tiwari kaihhruaina hnuaiah Mizoram rawn tlawhin Mizoram Governor Shri K. Rajasekharan chu a chenna in ah an hmu a. Chhun dar 12-ah Mizoram Legislative Assembly tlawh lehin hetah hian Mizoram Legislative Assembly Speaker, Pu Hiphei bakah Mizoram Legislative Assembly hnuai a MLA 6 te telna Ethics Committee te nen meeting an nei leh a ni. Ethics Committee Chairman Pu J.H. Rothuama hi a remchanloh avangin Acting Chairman Pu P.C. Zoram Sangliana'n he meeting hi a kaihruai a ni.

  

He meeting-ah hian State pahnih inthianthatna bakah Assembly House chhung a MLA te awmdan leh inkaihhruaina te sawiho niin, State pahnihte MLA leh an MLA Fund hman dan leh enzui dan te sawiho a ni bawk. Jharkhand MLA te hian Mizoram chu nuam an tih thu leh Assembly House chhung a MLA te awmdan chu entawntlak an tih thu an sawi a, House chhung zahloh avanga MLA hrem ngai pakhatmah an la awmlo te chu an fak hle bawk a ni. 
  

Meeting zawhah chhun chaw eipui niin Mizoram Legislative Assembly Secretariat te leh Art & Culture Department te kaihhruaina in Falkawn Zo Khua tlawhpui an ni a. Ni 31stAugust, 2018, Zirtawpni ah Aizawl an chhuahsan leh ang.