Vawiin tlai khan Chief Minister Pu Lal Thanhawla chu a chenna inah, Japan International Cooperation Agency (JICA) India Office a hotulu Pu Takema Sakemoto leh a thawhpui dang pahnih ten an hmu a, Pu Sakemoto hian JICA in Mizorama hmalakna an neih mek dan a hrilh a ni.

Chief Minister chuan vawiina Mizoram Sawrkar leh JICA in agriculture leh irrigation tih hmasawn nan thawhhona thutlung an ziah chu Mizoram hmasawnna atan mellung pawimawh tak anih thu sawiin JICA in Mizoram an duhsakna chungah lawmthu a hrilh a. Pu Sakemoto chuan he thawhhona in a huam chin tur leh a tum te sawiin he thawhona hian JICA leh Mizoram inkarah thawhhona bung thar a hawng a ni, a ti a. JICA hotulu in he project bakah inkalpawhna tihhmasawn nan NH-54 tihchangtlungna tur project an buaipui mek thu Chief Minister hrilhin hemi project hi tih puitlin anih theih Sawrkar laipui nen in be chungin theihtawp an chhuak mek thu a sawi.

Pu Sakemoto chuan agriculture leh irrigation project chungchangah JICA mithiamten Mizoram an chamchilh tur thu hrilhin technical lamah inzir nan Mizoram atang pawhin mithiam ten Japan a tlawh dawn bawk a ni, a ti a. He Project hian Mizoram tan hmasawnna a thlen ngei a beisei thu a sawi bawk. Chief Minister chu he project kaltlangin Mizoram leh Japan laichinna a in tan dawn a tiin a tihchak zel nan Mizoram sawrkarin theihtawp a chhuah tur thu a sawi.