Department of English, Mizoram University huaihawt ni 3 awh tur International Seminar “Claiming Differences : Literatures and Cultures” tih thupui chu vawiin khan Chief Minister Pu Lal Thanhawla’n MZU Auditorium ah, khuallian niin a hawnna programme a hmanpui.

Chief Minister Pu Lal Thanhawla chuan Mizoram University hnuaia Department hrang hrang ten hetiang National leh International Seminar an huaihawt thin chu zirtirtu te mai bakah zirlai naupangten an hlawkpui ngei a beisei thu sawiin heng kaltlang hian zirlai naupangten tawnhriat tha tak tak nakina an tana la tangkai tur an nei thei a ni, a ti a. Seminar thupui “Claiming Differences : Literatures and Cultures” chungchang sawiin hnam thu leh hla (literature) leh hnam ziarang(culture) chanchin hi thil ril leh thuk tak a ni a, kan hnam chanchin theuh hi dik taka ziah a pawimawh thu sawi langin British leh awp bettu dangten an duh dana kan chanchin an ziah te hi ennawn a, a tul anih chuan heng hi thlak a hun tawh a, chumi atan chuan vawiina mithiam fuankhawm te hian mawhphurhna lian tak in nei a ni, a ti.

Chief Minister chuan India chu hnam hrang hrang, tawng hrang hrang leh ziarang inang lo tak tak te chenho na ram a ni tiin heng kan inanlohna te hi inhrethiam tawn a, heng te hi impumkhatna atan hman tangkai leh zai khata insuih theih hi a pawimawh ani tiin India rama chengte tam zawkin Hmarchhak leh a chengte chanchin hi an hriat chhoh zel a pawimawh a ni,a ti a. Hmarchhak chanchin sawiin min awpbettu British te khan Hmarchhaka hnam hrang hrang te chanchin an ziahnaah hnam rawng leh hnam mawl te angin an ziak fo a, tunah chuan thangthar tam takin an hnam chanchin an ziak tan tawh a, heng an ziahna enga khawvel hmun danga chengte min hmuh dan hi a tha lamin a in thlak chho mek a ni, a ti.

Vawiina Seminar hawnnaah hian Prof. Paul Arthur, Chair in Digital Humanities & Social Sciences, Edith Cowal University, Australia in Keynote address a sawi a, MZU Vice Chancellor, Prof. R. Lalthantluanga pawhin he hun hi a hmanpui a ni. Seminar hi North Eastern Council (NEC) leh Indian Council for Social Sciences Research (ICSSR) New Delhi te puihnaa buatsaih niin October ni 28 thleng a awh dawn a ni.

Seminar hawnna  inkhawm  a hman pui zawh ah hian Chief Minister hian MZU Campus chhunga IIMC Aizawl Centre sak mek chu a tlawh bawk a ni.