New Delhi a Sorkar thil pawimawh buaipuia cham mek Pu H. Rohluna, School Education Minister chuan tukin zing dar 9:30 khan Union Minister of Human Resource Development Pu Prakash Javadekar chu Shastri Bhavan-a a Office Chamber-ah a kawm a. Mizorama CSS hnuaia Hindi Teacher-te harsatna tawh mek chinfel sak turin a ngen.

Pu H. Rohluna hian Central Minister hi CSS Hindi Teacher ten March 2016 atanga hlawh an la lak loh avanga harsatna an tawh nasat dan leh, hlawh la lo chung pawha tha taka hna an thawh zel thu te hrilhin, kumin atana an hlawh tur hi Central Sorkarin release sak thuai turin a ngen a. Heng CSS Hindi Teacher-te rawih hun chhung, February, 2017 a tawp mai tawh tur chu kum 2017 hnu lamah pawh rawih chhunzawm zel an nih ngei theihna tura hma lak sak turin Central Minister hi a ngen bawk.

Union Minister Pu Prakash Javadekar chuan Mizorama Middle School leh High School-ah Hindi Compulsory Subject a ni chu lawmawm a tih thu sawiin, CSS Hindi Teacher-te chuan an hlawh an hmuh ngei tur thu Pu H.Rohluna chu a lo hrilh a. A rang thei ang bera umzui tura a khawihtute a hrilh nghal tur thu leh, a Scheme hi Mizorama hman tangkai anih dante enfiah thuai a, chhunzawm zel a nih theihna tura a tul anga hma lo lak sak nghal a tiam bawk.

Minister Pu H. Rohluna hi Pu Arvind Ray, Principal Resident Commissioner, Mizoram House, New Delhi, Pu K. Lalthawmmawia, Director of School Education leh Pu Umakant, OSD, Mizoram House, New Delhi ten an tawiawm a. Nimin (25.10.2016)-a Central Advisory Board of Education (CABE) Meeting, Vigyan Bhavan, New Delhi-a neihah Minister hi a tel nghal bawk a ni.

Attachment

  • Loading attachment...