Pu Joseph Lalhimpuia, Parliamentary Secretary Industries Department chuan “Mizoram siamtha turin a chhunga chengten mawhphurhna sang tak kan nei a, hnamdangin min thawhsak dawn lo a ni”, a ti. He thu hi vawiin chawhma dar 11-a Chanmari YMA Hall-ah ‘State Level Workshop on PMEGP’ a hmanpui naah a sawi a ni.

Pu Joseph Lalhimpuia chuan Mizoram Sorkarin New Economic Development Programme a duanah Industry Department pawhin tih tur leh tanlakna tur pawimawh tak a neih tur thu tarlangin, Handloom tihhmasawnna tur pawh cheng vaibelchhe 9 dah a nih thu a sawi a. PMEGP workshop-a telte chu loan an lakte eng anga ngaihpawimawh tur nge tih zir chhuak tura chahin, tun dinhmunah PMEGP loan latute zingah loan rul zaa 40 pawh an la tling lo chu fel lo a tih thu leh, loan latute tan lak a ngaih thu a sawi a ni.

Parliamentary Secretary chuan Mizoram Sorkarin Skill Development Training turin Mizo thalai thahnem tak an tirh chhuah tawh thu sawiin, hnathawh bul tanna turah Bank lamin sum min ngaihtuahpui zel theih chuan kan ram sum leh pai dinhmunin a thatpui hle dawn a ni, a ti a. Thalaite mahni kutkea an din theih nan Bank-te hian tun aia nasain sorkar hi thawhpui se a duh thu sawiin, hetiang a nih chuan sorkarin pawhin a pui let zel dawn a ni, a ti bawk.

He hunah hian Pu K. Lianzuala, KVIC Chairman pawhin thusawiin, Mizoram KVI chu India hmarchhakah hnathawk tha ber pawl an nih thu a leh, kum 2008, 2009 leh 2016 ah te Best Performance Award Mizoram KVI-in a dawn thu a sawi a. PMEGP loan latute chu chhungkua mai ni lo, ram tana chhenfakawm ni turin a chah a. Loan rul tha lo chu midangte kawng daltu an ni thei tih sawiin, ram neitu thinlung pu turin a chah bawk.

Vawiin Workshop buatsaihah hian parliamentary Secretary leh KVI Board Chairman bakah hian Aizawl DC Pu Kannan Gopinathan DC leh Bank hotu engemawzat an tel a, PMEGP loan diltu thahnem tak an kal a ni.

Mizoram KVI hian kum 2009-2010 atangin PMEGP loan hi an buaipui tan a, nikum thleng khan margin money atan cheng nuai 2918.43 an sem chhuak tawh a; unit 2689 din tawh niin, hnathawh tur siam pawh 20,097 a tling tawh a ni.