Vawiin dt. 24.1.2013 (Ningani) 10:30 am khan Aizawl Club-ah JNNURM Scheme hnuaia Aizawl khawpui kawng siam hna kalpui mek enpuitu High Level Monitoring & Supervision Committee (HLMSC) Meeting chu Pu R.L Rinawma, Principal Secretary, UD & PA Department kaihhruaina hnuaiah neih a ni.

JNNURM hnuaiah hian kawngpui pawimawh tak tak pathum (i) Improvement & Widening of City Road Phase – I (Rs. 3873.40 lakh) (ii) Widening and Improvement of Vaivakawn to Mizoram University (Rs. 1907.64 lakh) (iii) Sihhmui to Mizoram University as spur of Aizawl City Road (Rs. 5309.32 lakh) te thawh chhoh mek a ni a.Heng project te hi tha tak leh tluang taka thawh a nih theih nan Committee chuan ruahmanna siamin hmalakdan tur hrang hrang te a ruahman a. Heng Project hnuaia kawngpui tihzauh chungchang te, kawngpui siam avanga lirthei veivak chungchanga harsatna awm thei hrang hrang te sawiho a ni a. A hlawhtlin theih nan hian mipuite tawiawmna a pawimawh thu sawi a niin mipuite tawiawmna a ngen nghal a ni. Heng project te hi JNNURM scheme tawp hun 31.3.2014 chhunga zawh a nih theih nan theihtawp chhuaha hna thawk turin PWD pawh ngen an ni. Hna hi tha tak leh tluang taka thawh a nih theih nan a tul ang zelin Local Council, YMA te pawh phungbawma sawm nise a ti bawk a ni.

He meeting ah hian Department hrang hrang Urban Development & Poverty Alleviation Department, Public Works Department, Finance Department, Land Revenue & Settlement Department, Aizawl Municipal Council, Police (Traffic), Central YMA atangin an tel a ni.