Vawiin khan Chief Secretary Pi L.Tochhong, Mizoram Remote Sensing Application Centre (MIRSAC) Chairman ni bawk hovin Secretariat Conference Hall-ah Spaced Based Information Support for Decentralised Planning (SIS - DP) Workshop neih a ni.
Chief Secretary chuan ruahmanna tha nei tura data tha a pawimawh thu leh Remote Sensing leh GIS thiamna hmanga data based buatsaih a ni thei ta chu lawmawm a tih thu a sawi a. Workshop a tel zawng zawng te chuan an ngaihtuahna leh hmathlir te zalen taka sawihova, tangkai taka hun hmang turin a chah a ni.
Department of Space leh MIRSAC buatsaih he workshop-ah hian North Eastern Space Application Centre (NESAC) Director Dr S Sudhakar chuan SIS-DP Project nihphung tlangpui hrilhfiahin sorkar laipui Department of Space bultuma India ram pumpuia hmasawnna tha zawk a awm theihna atana ruahman a ni, a ti. District thlenga ruahmanna tha zawk neih theihna tura data based pawimawh tak buatsaih chu he Project-in a tum ber a ni tih sawiin Department hrang hrang te pawhin tha taka thawhpuia an mamawh ang data leh information lo pe thin turin a chah a. Mizoramah chuan rampum huap pawha Remote Sensing Centre tha tak a awm avangin he project hi tha taka hlenchhuah a nih a beisei thu a sawi.
MIRSAC Project Director Dr RK Lallianthanga chuan Workshop neih a nih chhan leh tuna project kalpui mek a nih dan a sawi a. He project hi thawh zawh a nih hunah chuan Development Department tinin tangkai takin an hmang thei dawn a ni, a ti.
Senior Scientist Pu Lalnunsiama Colney pawhin SIS-DP Data Aibawk Block zirchianna a sawifiah a. Dr Vanlalzara, Chief Scientific Officer, Directorate of Science &Technology chuan lawmthu sawiin hun hnung a khar a ni.
He workshop-ah hian National Remote Sensing Centre Hyderabad-a Scientist ‘SG’ Dr S. Srinivasa Rao, Indian Institute of Remote Sensing (IIRS) Dehradun-a Scientist ‘SD’ Prasankumar Gupta leh North Eastern Space Application Centre (NESAC) a Scientist Suchitra Haobam Devi te pawh an tel a. He project ram puma kalpui a nihdan an sawi a ni.
Workshop-ah hian sorkar mi thiamte bakah Department hrang hrang aiawh te leh MIRSAC Scientist te an tel a ni.
