Mizoram Home Minister Pu R.Lalzirliana chuan Johny F.Lalhmangaihzuala s/o F.Vanlalmuana, Lunglei Theiriat Veng, Lovely Professional University, Punjab-a B.Tech zirlai, April 26 a University Week Football match an khelh laia Sudanese zirlaiten an sawisak rawn vanga a thih dan chungchang Union Home Minister P.Chidambaram hnenah ziaka thlenin he thihna hian Mizoram mipuite, a bik takin thalaite thin a tithawng hle tih a hriattir a.
Mizoram sorkar aiawhin Pu Zira chuan Union Home Minister chu he thihna chungchang hi chhuichiang a, hetiang pawi khawihna rapthlak tak hi a thlen nawn tawh ngai loh na turin Punjab sorkar, Lovely Professional University leh Sudan Embassy te chu hriattir turin a ngen a. Hemi rual hian Johny F.Lalhmangaihzuala chhungte hnenah zangnadawmna tha tawk tak pe tur leh he thihna a inhnamhnawihte chu a rang thei ang bera man chhuak a, an chungah hremna dan lek nghal turin a ngen bawk a ni.
