Lok Sabha MP inthlan lo awm tura inpuahchahna kal zelah vawiin khan Jt. CEO Pu H. Lalengmawia hovin Aijal Club-ah political party aiawhte, tlawmngai pawl hrang hrangte leh press mite nen inkawmna hun hman a ni.

Jt. CEO chuan vote thlak ngaihpawimawh chungchangah Mizoram mipuite an thangharh tawh hle chu lawmawm a tih thu sawiin, MP election lo awm turah pawh nikum MLA inthlanpui aia mi tam zawkin vote an thlak theih nan tan la tlang turin kalkhawmte chu a ngen a. Inthlanna atana inpuahchahna kalpui mek dante sawiin, Model Code of Conduct bawhchhia a inpuhna pawh Election Directorate-ah chuan hriat a la nih loh thu a tarlang a ni.

Jt. CEO thusawi zawh hian kalkhawmte chuan inthlan chungchanga hriatchian duh hrang hrangte zawtin inkawmna hun tha tak neih a ni.