Parliament inthlan lo awm turah Candidate te chu anmahni infakna leh vote zawnna thil Chanchinbu leh TV kaltlanga an puanzar tur reng rengah ECI dan zawm vek tura tih an ni.

Election Commission of India in inthlan laia Print leh Electronic Media te kaltlanga politics thil chhuah vil tura a din Media Certification & Monitoring Committee, Kolasib District chu vawiin khan DC Office-ah an thukhawm a. He hunah hian Media te thil zawm tur hrang hrangte an thlir hova. Telivision-a party thil chhuah tur a awmin MCMC atanga phalna (Certification) an dil hmasa tur a ni tih he meeting-ah hian tarlan a ni a. Media Centre, DC Office Kolasib-ah a Prescribed form lak theihin a awm a, hetiang dil tur chuan form hi an hmang ngei tur a ni a. Recognised party candidate tan thil chhuah tur chhuah hma ni thum (3) ah dilna hi an thehlut tur a ni a, unrecognised party tan chuan chhuah hun hma ni sarih (7) ah dilna an thehlut ngei tur a ni.

Vawiina MCMC Meeting-ah hian party candidate tinte chu MCC dan zawm tura beisei an ni tih pawh sawi langin chi leh sakhua inthliarna thil leh mimal nun hmanga uchuak taka inbeihna te a awm a nih chuan hei pawh hi an chunga dan hmanga action lak theih a nih dante pawh tarlan a ni.

Naktuk hian Kolasib District chhunga Chanchinbu chhuak leh TV operator te chu Media room, Kolasib DC Office-ah MCMC hian meeting a neihpui dawn a ni.