Vawiin khan Joint Chief Electoral Officer, Pu H. Lalengmawia chuan a pisaah kumin inthlan neih tura inbuatsaihna chungchangah chanchinbumite kawmna hun a nei.

Joint CEO chuan Mizoram pumah Voters hi revision hnuhnung ber, 16^th August, 2013 thleng khan mi 6,86,305 awmin, continuous updation hi Nomination File tawp ni thlenga kalpui a nih avangin, Vote nei thei zat hi an pun a beisei thu a sawi a. Polling Station hi a vaiin 1,126 awmin, heng zinga 94-te hi critical Polling Station an ni a, Polling Station zingah mobile connectivity awmna 929 leh mobile connectivity awmlohna 197 awmin; eng (electric) awmlohna Polling Station 96 leh  Mobile connectivity bakah eng awmlohna Polling Station 106 a awm a; henga hman tur hian wireless set pek tawh niin, eng awmlohnaah pawh generator leh solar-te hman anih tur thu a sawi bawk.

Candidate hi mi 142 awmin, bial hniha ding kawp mi pathum an awm a, AMC Councillor- te pawhin ADC member nilai te ang bawkin, High Court thuchhuak angin bang hmasa kher lova MLA seat an chuh theih thu a tarlang bawk.

VVPAT chu Aizawl District chhunga Assembly Constituency 10-ah hman a ni dawn a, hei hian EVM rintlakzia lantirin, voter-ten an Vote-na kha chiang takin an hmu thei dawn a ni. EVM Second Level Checking and Commissioning pawh tun thla ni 20 ral hmain zawhfel tura ruahman a ni bawk.

Kumin inthlan atan hian General Observer 31, Expenditure Observer pakua, Police Observer pahnih leh Awareness Observer pahnih an awm a; Mizoram pawn atangin sipai company 31 rawn duty tura ruahman niin, Nagaland atangin Company 12, Sikkim atangin pali leh Tripura, Assam leh Manipur atangin Company panga theuh, an vaiin mi 3000 chuang an ni dawn a ni. Dan leh thupek kenkawh kawngah pawh khawng taka kal a nih thu sawiin, political party tinte leh mipuiten Election Commission of India thupekte an zawm thatnaah lawmthu a sawi bawk.

Pu H.Lalengmawia chuan, “ECI chuan India khua leh tui zawng zawngten Vote thlak hi an chanvo (right) a nih avangin, indansak hi thianglo a ni, a ti a; inthlan lo neih tawh thinah fello a awm avangin,  Ministry of Law Justice & Company Affairs leh ECI chuan Tripura-a Bru raltlante chu Section 60 (c) of Representatives of Peoples’ Act of 1951 hmangin ‘Notified class of Citizens’ ah puangin, Vote an thlak theih dan tur hi a ruahman ta a ni,” a ti. Bru raltlan Tripura Camp-a awmte tan hian Nodal Officer pasarih leh Desk Officials 74 ruat an ni tawh a, ECI atangin Observer paruk leh Special Observer atan West Bengal CEO a rawn kal bawk ang. Tripura Bru camp-ah hian Voters 11,642 awmin; Mamit, Kolasib leh Lunglei District chhung atana Vote nei an ni a; ni 19 leh 20, November, 2013 hian Vote an thlak anga, hemi buaipui tura kal Polling Party-te tibuai zawnga omlo turin Election hotute chuan ngenna an siam bawk a ni.