Vawiin khan Pu E.K. Majhi, Joint Secretary, Department of Agriculture & Cooperation, Government of India chuan Mizoram a rawn tlawh a. Agriculture Committee Room-ah Agriculture Department leh Soil & Water Conservation Department Officers te meeting a neih pui a, Agriculture Department-in Scheme hrang hrang hnuaia an hmalakna te power point presentation hmangin entir a ni.
He meeting-ah hian Pu Majhi, Joint Secretary chuan Mizoram a rawn tlawh chhan sawiin Plan 11-na chhunga State te nauten loneitute chawikanna atana hma an lak dan leh an hnathawhte hriatpuia, an harsatnate hmuhpui pahin 12th Plan chhunga Agriculture leh a kaihhnawih Department ten Scheme hrang hrang hnuaia hma an lakna tur kawhhmuh leh hrilhfiah a nih thu a sawi a. Agriculture Department Officer ten an hmalakna hrang hrang an entir chuan phurna nasa tak a siamsak thu leh State liante nena khaikhina, Mizoram State-in sum tlem zawk an dawng chung pawha an hmalakna chhuanawm a tih zia a sawi bawk.
He meeting-ah hian Agriculture Director, Dr.C.Lalzarliana chuan Crop Husbandry hnuaia hmalakna langsar zualte tarlangin an hmalakna-ah leilet leh terrace-a siam tur ram zau tak la awm te, Agriculture Link Road laih tur la tamzia te, Mizoram-a Oilpalm hlawhtling taka chin a nih thu leh loneituten harsatna chi hrang hrang an tawhte pawh a tarlang nghal bawk.
Dr. Jerome Rokima, Director of Soil & Water Conservation pawhin RVP Scheme hnuaia an hmalakna hrang hrangte a entir a, a bik takin Thelret chin hi Mizoram loneitute tan hlawkna nasa tak a la nih tur thu a sawi lang bawk. Agriculture Officer dangte pawhin anmahni enkawl hnuaia loneitute tana an hnathawhte a lemin an entir bawk.
Joint Secretary hian Sihphir leh Durtlanga NWDPRA leh WDPSCA hnuaia project hrang hrang te a tlawh nghal a. Naktuk ah Kolasib District-a ICAR Complex tlawhin, loneitute nen inkawmna hun a hmanpui ang.
