Pu Atana Purkayastha, IAS, Joint Secretary, Technology Mission on Oil Palm (TMOP), Ministry of Agriculture, Government of India chu ni hnih chamin Mizoramah a lo kal, a rual hian Dr. A.P. Singh, Deputy Commissioner (TMOP), Govt. of India pawh a rawn kal ve.

Nimin ni 4.7.2012-a lo thleng Officer pahnihte hian Mizorama Oil Palm chin mek dinhmun en pahin Mizoram Sorkarin Oil Palm chungchanga a thawhpui Company 3 – Godrej Oil Palm Limited, Ruchi Soya Industries Limited leh 3F Oil Palm Agrotech Private Limited ten Oil Palm herna khawl (Oil Palm Mill) an bun dan tur chungchang sawipui tura lo kal an ni.

Heng Officer pahnihte hi Agriculture Minister, Pu H. Liansailova leh Chief Secretary Pu Van Hela Pachuau te nen inkawmin Mizoram Oil Palm chin meka hmalak zel dan tur leh Oil Palm chingtute harsatna sutkian dan tur an sawiho a. Vawiin ni hian Pu T.V. Fambawl, Agriculture Secretary kaihhruaiin State Guest House-ah Company aiawh te, Oil Palm chinna District-a Zonal Committee Chairman leh District Agriculture Officer te leh Officer pawimawh dangte nen Meeting pawimawh tak an nei bawk.

Pu Purkayastha leh Dr. A.P. Singh te hian Kolasib District-a Bukvannei hmuna Godrej Oil Palm Limited-in Oil Palm herna (Oil Palm Mill) an bunna tur an enfiah pahin Kolasib District-a Oil Palm chinna hmun thenkhat an tlawh nghal a. Bukvannei-a Oil Palm Mill bun tur chu August thla chhung ngei hian a lungphum phum hman beisei a ni.

Aizawl leh Lengpui Airport inkar Lengte rama Oil Palm chinte pawh a hmunah an en nghal a, Mizorama Oil Palm chingtute tana ruahtui khawlna bun a tulzia an sawi uar hle.