Mizoram Assembly Speaker Pu R. Romawia chuan vawiin chhun khan I&PR Auditorium a inkhawm tawite buatsaih ah Mizo Thu leh Hla leh chanchin chhuina lehkhabu tha tak tura rin 2 (pahnih) - Hlaraw hrilhfiahna leh a hman dan leh Sangsarih khawpui tih chu mipui lei theih turin a tlangzarh. Mizo History Association President Pu Darchhawna kaihhruai inkhawm ah hian Speaker chuan Mizo hla hrang hrang chhui chhovin, sap Missionary te lehlin hla tha tak tak te, Mizo irawm chhuak fakna hla leh lengzem hla tha tak tak kan neih dan a tarlang a heng hla te zingah hian hla tlar tawp dan inang zel chi te, a thlukin a chawi ang a thu rem thiam pawimawhna te leh hla thu dik hman tangkaina te sawiin heng thil pathum inkawp rem thlap a hla tha tak phuah chhuak thei turin hla phuahtute hnenah chona a siam a ni. Pu Romawia chuan history zir kawngah Ziaktu leh zirtuten ngaihdan hrang hrang an neih theih dan pawh sawiin chung ngaihdan te chu inpersan leh inhnialna chawk chhuak thei ni thin mahse chu tak chu history hlutna a ni a. Mizo pipu chanchin chhuina ah pawh hei hi hriatthiam a pawimawh fo thin a ni a ti. Heng lehkhabu pahnih ziaktu Pu C. Chhuanvawra hian a lehkhabu tihchhuah 10 na leh 11na a ni a Hlaraw hrilhfiahna leh a hman dan tih bu hi Pu Lalrammawia Ngente chuan thlir lawkna neiin a bu te hle mahse awmkhauh tak, belhchian dawl a ni a ti a. Sangsarih khawpui tih thlir zautu Dr. J.V. Hluna pawhin a ziaktu thawhrimna leh chhuizauna fakawm a tih thu a tarlang a ni. Lehkhabu tlangzarh chhimtu Mizo Academy of Letters member te, Chanchinbumi leh College-a History subject zirlai engemaw zat ten sawihona hun an hmang zui a ni.