Vawiin khan Mission Veng DYO Hall-ah Aizawl khawpui chhung NLUP cluster 4 tan puanthui khawl leh agarbati kuang siamna khawl pek chhuah a ni a. Aizawl South I, Aizawl South II, Aizawl South III leh Aizawl West III atangin mi 21 hnenah puanthui khawl chi thum - Janome, Overlock Machine leh Kekhawl bakah sum Rs.7,89,390/- sem chhuah a ni a. Mi 72 hnenah Agarbati kuang siamna khawl 2 theuh leh sum Rs.10,80,000/- pek chhuah a ni bawk.

Khuallian Pu R.Selthuama, Chairman NLUP Implementing Board(NIB)chuan tanpuina dawngtute chu an vanneih zia sawiin India ram state thenkhatah kut hnathawktu tam tak leiba rulh theih loh vanga intihlum an awm laiin NLUP dawngtu te chuan cheng khat mah an rulh ngai lovin a nuai tel tanpuina an dawng a ni, a ti a. Tun anga hun tha leh remchanna an tawn ang hi a inher chhuak tawh kher lo thei, tiin hmang tangkai turin a chah a. Mizoram sorkar-in kum 1992 bawr chhova NLUP a kalpui hmasak a mi hlawhtlingte chanchin leh titha ve duh lova hlawhchham tate dinhmun tarlangin Pu Selthuama chuan tuna NLUP tanpuina dawngtu chuan duhthlan tur kawng hnih an nei, a ti a. NLUP thil tum tih hlawhtlin chu an tan lawmthu sawi dan tha ber a ni, a ti bawk.

Pu Selthuama chuan Haryana bawng lakluh chungchanga harsatna thleng ah thil tih fuh tawk loh a awm tih NIB chuan a pawm tih sawiin hetiang vanduaina lo thleng hi sorkar in pawi a tihzia pawh a tarlang nawn a. Chumi rualin a dawngtute zingah lawm tak tak leh, tluang taka vulh zui mek mi eng emaw zat an awm tih a sawi a. NLUP hmalakna ah a tha lo laite siam tha tura media lam ten a chhe lai an au chhuahpui thin chu tha a tih thu sawiin hemi rual hian tanpuina dawngtute fuih nan leh mipui hriat atan NLUP hmalakna a thil tha tam tak awm te chu tarlang ve fo turin Pu Selthuama chuan media lama thawktu te a ngen a ni.

Vawiin-a khawl sem inkhawm hi Pu J.Hmingthanmawia, Additional D.C in a kaihruai a. Tanpuina sem zawhah Pu Zorammuana, Secretary, NIB in lawmthu sawiin hun hnung a khar a ni.