Vawiin khan Directorate of Information & Public Relations Department Auditorium ah National Press Day 2018 hman a ni a,” Journalism Ethics & Challenges of Digital Era” tih thupui a hman a ni. Pu Lalbiaktluanga, I&PR Secretary chu khuallian niin Pu David L Thangliana, Director in he hun hi a kaihruaia, Dr Irene Lalruatkimi, Asst Professor, MZU hnen atangin presentation ngaihthlak a ni bawk. He hunah hian Pu Zonunsanga Khiangte, President MJA, I&PR Officer leh Staff te leh MJA member thahnem tak an tel a ni.

Pu Lalbiaktluanga, I&PR Secretary chuan, Khawvel changkanna ina a ken tel Internet te avang hian thu puan darh kawngah pawh kan chak ta hle a, thu thar rintlak loh leh belhchiandawllo pawh a tam phah hle a ni, a ti a, kan thuthartheihdarhtute hi mipui rin ngam kan nih theih nan chuan thu kan chhuah danah Journalist ten Principle of Ethics kan zawm a, kan vawn nun tlat a pawimawh hle a ni, a ti. Pu Lalbiaktluanga chuan Journalist te chu an thu chhuahah mawhphurna an la ngam tur a ni a, midangte ring mai lova mahni ngeiin kan hmuh leh kan hriatte chiang takin kan ziak tur a ni, a ti a, tan bik leh thlei bik awm lova thuchhuah turin leh midangte rilru ti natu ni lova mipuite tana mit leh beng ni zawk turin a chah bawk.

National Press Day 2018 hmannaah hian Dr Irene Lalruatkimi, Asst. Professor, Deptt. Of Mass Communication, MZU chuan ,” Journalism Ethics & Challenges of Digital Era” tih thupui hmangin presentation a pe a, chanchinbumite leh mipuite thudik tawklo thehdarhna laka kan in ven dan tur leh kan thliar thiam dan tur kawng hrang hrangte a tarlang a, MJA member te nen inkawmna hun neih a ni bawk. Pu Zonunsanga Khiangte, President MJA chuan Press Council of India din a nih dan leh National Press Day hman dan tlangpuite sawiin Pi Lallianpuii, Jt. Director in lawmthu sawiin hun tawp a hmang bawk.