Vawiin khan National Health Mission hnuaia Rashtriya Bal Swasthya Karyakram (RBSK) leh Manipal Hospital, Bangalore tangkawp chuan Screening Camp for Congenital Heart Disease (pian tirh atanga lung natna nei endikna) an buatsaih a. Vawiin hi screening test an buatsaih vawi hnihna a ni a. Nikum October thla khan hlawhtling takin an lo huaihawt tawh a ni.

August Ni 28, 2017 khan Manipal Hospital, Bangalore leh RBSK hian thawhhona thuthlung an ziak a. Kum 2017-2018 chhung khan Manipal Hospital-ah hian naupang 28 hlawhtling taka zai an ni tawh a ni. Heng inzaina senso zawng zawng hi RBSK atanga pek niin zinna leh thlenna senso erawh chu mahni intum a ngai thung a ni. Congenital Heart Disease hi enkawl dan tur dik taka enkawl an nih chuan harsatna nei zui lovin hrisel takin an dam a, hei vang hian pian tirh ata lung natna nei an ni nge ni lo tih hmuchhuak turin screening test hi buatsaih a ni.  

Mizoramah RBSK hi July 2013 atang khan kalpui tan a ni a. Programme hnuaiah hian nausen pianghlim atanga kum 18 inkar hriselna endikna neih thin a ni. Natna nei hmuhchhuahte chu enkawlna tluantling an hmuh theihna tur hmunah rang taka tirh thin an ni a. Heng natna zawnchhuah hna hi hospital-ah te, CHC/PHC te,sub-center nau neih theihna hmunah te, sawrkar school leh sawrkarin a puih school bakah Anganwadi center-ah te Mobile Health Team te’n an zawng chhuak thin bawk a ni.

RBSK  hian natna sawmthum (30) a huam a, heng zinga natna sawmpathum (13) enkawlna tur senso hi RBSK chuan a tum sak vek thei a. Heng senso tum sak dan tur hi sawrkar laipui chuan kaihhruaina a duang sa vek a, chumi zawm chung chuan hmalak zel tum a ni