Nizan dar 7:00 PM khan Mizoram State Legal Services Authority (MSLSA) chuan dan leh hrai chungchanga inhrilhriatna programme ‘Legal Services : Access to Justice for All’ tih chu Aijal Club-ah an buatsaih a. He programme-hi Supreme Court Judge Justice J. S. Khehar; Law Minister Pu Lalsawta; Gauhati High Court Chief Justice leh Patron-in-Chief MSLSA ni bawk Justice A.K. Goel; Gauhati High Court-a Judge leh Executive Chairman, MSLSA ni bawk Justice Ujjal Bhuyan; Law Secretary Pu Singthanga leh Advocate General, Mizoram Pu Biswajit Deb te’n an hmanpui a. Anni bakah hian Mizoram Bar Association hruaitute leh member te; Mizoram Judical Service officer thahnem tak leh MSLSA member te an tel bawk a ni.
Supreme Court Judge Justice Khehar chuan Mizoram chu state ralmuang a nih angin pawikhawihna hrang hrang leh thubuai hlabuai te pawh a tlem tia a hriat chu thu lawmawm tak a ni, a ti a. Kristian te chu ‘great brotherhood of charity’ in ni a tiin hemi avang hian Mizorama Kristian te chuan mirethei leh mi huaihnung zawk ten dan leh hrai an hriat zauna chungchangah te, a inhrilhhriatna kawngah te leh dan hnuaia heng mi ten an chanvo an hriatna kawnga te rawngbawlna ropui tak in thawk thei a ni, a ti a. Legal Services Authority hnathawh chungchang sawiin mirethei ten an chanvo an chan theih nan, a tul chuan Legal Services Authority-in petition an thehlut thei a ni, a ti. Mipui inrelbawlna sawrkar hnuaiah mipuiten an chanvo tur dik tak an chan chuan khawtlangah intluktlanna a awm a, mipuite hlimna a pe thei bawk a ni, a ti.
Pu Lalsawta chuan Mizoram chu ziak leh chhiar thiamna lamah sang viau mah ila dan leh hrai hriatna chungchangah chuan kan la hniam hle a, hemi lama mipui te hrilhhriatna kawngah MSLSA chuan hna thawk mekin mi harsa te tan awlsawmna a siam saka amaherawhchu hmabak leh thawh tur tam tak kan la nei, a ti a. Dan leh hrai inhrilhhriatna kawngah media te an pawimawh thu sawiin media te tanpuina zarah hemi kawngah hian hna tam tak kan thawk thei a ni, a ti a. Lok Adalat chungchang sawiin Lok Adalat-in thubuai inremna kawnga an hnawthawh chu ropui a ti bawk.
Gauhati High Court Chief Justice Justice A. K. Goel chuan dan hnuaiah mite chu an intluktlang veka, mahse mirethei leh mi harsa zawk ten an chanvo an hriat loh thin avangin ngawi rengin an harsatnate an tuar thin a. Mi hausa leh mi thiltithei te chuan an chanvo hre kar in an chanvo an humhalh a, mahse mirethei ten thubuai an neih in, an chanvo an hriat loh avangin harsatna namen lo tawkin jail-ah te tan phah thin a ni, a ti a. Dan leh hrai inhrilhhriat hi a pawimawh em em a ni tiin, tumah in midangte chanvo kan chhuhsak tur a ni lo a, an chanvo te an chan theih nan kan thawkho zawk tur a ni, a ti bawk.
He huna inlawmna thuchah sawitu Gauhati High Court Judge Justice Ujjal Bhuyan chuan mi harsa zawk ten thubuai an neih in rolrelna an chan theih nan pan tura an hriat a pawimawh a, hetah tak hian Ukil rawihna an neih loh chuan Legal Services Authority-in a thlawnin Ukil an rawih sak thei a ni tih an hriat a pawimawh hle a ni, a ti. Judge pahnih te chanchin tlangpui a sawi bawk. Pu Thang Lianmang Guite, Member Secretary, MSLSA chuan lawmthu sawiin hun a khar a. Hemi hnu hian Judge pahnih te pualin cultural programme leh zanriah butsaih a ni bawk.
