No.2702/2020-2020

Aizawl, the 3rd July 2020 : School Education Minister Pu Lalchhandama Ralte chuan July 15,2020 a School Academic Session tan tura ruahmanna lo siam tawh chu Ministry of Home Affairs-in COVID-19 vei pung chho zel avangin India ram pumah July 31 thleng zirna la tan rih loh tur a tih avangin kaltlangpui theih a ni dawn rih lo a ti a. School luh hun tur chu kan ram boruak a zirin la ruat leh a ni ang a ti bawk.

School Education Minister chuan he thu hi vawiina Darlawn khua a tlawhnaah amah lo dawngsawngtu khawtlang hruaitute nena inkawmhonaah a sawi a. School luh veleha zirna kalpui thei turin Department chu a inbuatsaih zel a ni a ti. Pu Lalchhandama Ralte chuan School luh theih loh chhung a rei avang hian zirlaiten nun kawng an bo loh nan nu leh pate chu inchhungkhurah nun dan phung an fate zirtir thin turin a sawm a. A theih ang anga moral education uar turin a sawm a ni.

Minister chuan Covid 19 lockdown avanga zawhfel theih loh HSSLC exam leh HSLC Compartmental exam te vawiina zawhfel theih a ni ta chu lawmawm a tih thu a sawi a, exam buaipuitute leh thawktute zawng zawng chungah lawmthu a sawi. Vawiina zawhfel Exam result chhuah hun tur sawiin Minister chuan CBSE in July 15,2020 ah result an tihchhuah dawn avangin July 15 aia tlai lova result tihchhuah tum anih thu a sawi a. Hei hi India ram hmundanga zirna zawm duhte an khawtlai loh nana ruahman anih thu a sawi bawk.

Pu Lalchhandam Ralte chuan hripui leng boruak rip tak chu tlema a ziaawm deuh tak avanga a bial mipuite nen an inhmu leh ta chu lawmawm a tih thu a sawi a. Hmasawnna hna sawrkar hmasain a lo thawh chu thiltha anih chuan chhunzawm anih tur thu a sawi a, Darlawna Mini sports centre siam sorkar hmasa zawhfel hman loh pawh tlangdung tana pawimawh anih avangin chhunzawm a ni dawn tih a sawi. Hmar tlangdung hmasawnna turin hmasawnna ruhrel din a ni zel dawn a, Tuivai lei dawhna tur leh a panna tur kawng siam hna te pawh tender a ni tawh a. Mipui mamawh bulpui hna thawh chuan a kalkawng a zawh zel dawn a ni a ti.

Sports Minister Pu Robert Romawia Royte pawhin thusawiin hun rei tak COVID-19 avanga hnathawk thei lova Sorkar leh mipui kan awm avangin mipuiin sum leh pai leh ei leh barah pawh harsatna kan tawk nasa a. Pathian zara COVID-19 hri a lo reh chhoh mek lai hian hmasawnna hnathawh tan chhoh theih a beiseiawm a. Budget-a hnathawhna tur atana sum awm sa Bank-ah te emaw dah tang mai mai lova a hmanna tur atana ruahman sa thawh zung zung hi Sawrkar sumin miretheite hnen a thlen theih dan tur anih avang leh Central Sawrkar atanga sum tam zawk hmuhbelh theihna anih avangin dan phal chhungah hmalak zung zung tul a tih thu a sawi.

Pu Robert Romawia Royte chuan Sawrkar hnathawk te COVID-19 avanga mipui harsatna hriaa an hlawh atanga engemaw zat Sorkarin a hren thensak phalsaka, an mihringpuite tanpuina remchanga ngaia phunchiar pakhatmah an awm lo leh mahni hlawh thawh phalte an pung zel chu lawmawm a tih thu a sawi a. Party politics avanga sawi bawrhbang duh an awm chu vanduaithlak a tih thusawiin lawm taka an hlawh thawh phal an awm zel chu a ropui a ni a ti.

Minister pahnih Pu Lalchhandama Ralte leh Pu Robert Romawia Royte te Darlawn tlawh hi Er H.Lalzirliana MLA leh Sports Director Pu Lalsangliana MCS ten an tawiawm a, Darlawn khaw chhunga hmun hrang hrang- Darlawn Multi sports centre, Tourist Lodge, GSA playground Darlawn, Higher Secondary School te, PHC damdawiin leh Police station-te an tlawh kual a, thuam that dan tur leh cheibawlzui dan tur an enho a, Darlawn PHC ah hian PPE, hand sanitizer leh glove te an pe a ni.