Vawiin khan State Level Committee on Green Mizoram(SLCGM) chu Co-Chairman Pu Lalrinmawia Ralte, Environment &Forest Minister hovin Secretariat Conference Hall-ah an thukhawm.

Meeting-ah hian kum danga Green Mizoram Day hman a nih tawh dan te thlir letin kum 1999 atanga 2013 thleng khan thing tiak 26,69,187 zet chu he Ni puala phun tur hian Mizoram chhung hmun hrang hrangah sem darh a lo ni tawh a, hlawhtling thawkhat viau mahse chhan hrang hrang vanga puitling zo ta lo a awm nual a. Chuvangin a venhim lam leh a puitlin ngei theihna tura hma lak chu Committee hian tha a ti a. Kumin June ni 11 a Green Mizoram Day hman turah pawh thupui atan “Thing phun uar la, venghim rawh” tih a thlang a ni.

Green Mizoram Day hawnna inkhawm pui ber hi Selesih a Central Agriculture University-ah hman a ni dawn a, hetah hian Environment & Forest Minister chu khuallian a ni ang. He ni pual hian Mizoram hmun hrang hranga phun tur thing tiak 9,37,115 zet chu Forests Department hian an dah hrang tawh a ni. Meeting-ah hian Green Mizoram logo siam leh he Ni puala kum tin thing tiak phun thin hi a him leh him loh enfiah tur Green Mizoram Monitoring Team din chu rem tih a ni a. Green Mizoram Monitoring Team hi Chief Conservator of Forests (CCF)(Adm) kaihruaina hnuaiah tlawmngaipawlte leh sorkar mi pawimawh dangte telin din ni se an ti a ni.

Kum danga tih thin angin kumin Green Mizoram Day ah hian sorkar department hrang hrang te chu anmahni puala thingphun neihsa tawhna (plot) theuhvah thingphun leh phun tawh sa an tihfai hnatlang neih leh ni se tiin Committee chuan a rel a. Hemi ni hian department tin ten anmahni aiawh Department Officer leh Staff te an plot neihna hmuna thingphun cheithat leh thing tiak phun thar neih nise tih a rel.

Department hrang hrangten an Department puala thing tiak an phun tur hi Forest Department hnen atangin City Park Aizawl ah lam tur inruat tur a ni a, Department puala thing phun ni hian Office chhuahsanin an department plot lamah thingphun tur nen kal tur a ni a, an kalna tur leh an mamawh ang chu an department ten lo ruahman sak turin State Level Green Mizoram Committee chuan a rel. Circular a awm hmanlo anih pawhin hei hi Department tinten hriattirna ah pawm nghal nise tih StateLevel Green Mizoram Committee chuan a ngen nghal bawk a ni.

SLCGM chuan ram kang venhimna kawnga titha khuate chu an District Headquarter theuhvah lawmman pek nise, District Level ti tha te chu State Level Green Mizoram Day hman na tur hmunah hlan an ni dawn a ni.