921/2022-2023
Kolasib dated 16th June 2022: Vawiin chawhnu khan Dr.Lalawmpuia Chhangte, Chief Medical Officer, Kolasib district pisaah ‘Steering Committee on Intensified Diarrhoea Control Fortnight’-te chuan thutkhawmna neiin Kolasib district chhunga June ni 23, 2022 atanga naupang kaw tha lo dona beihpui kalpui tur atan naupang kum 5 chin 9063 hnen ah hriselna kawng inzirtirna leh ORS damdawi sem tur a nih thu sawi a ni.

Dr Lalawmpuia Chhangte, CMO chuan kaw tha lo chu natna hrik chi hrang hrang avanga thleng thei a nih thu leh kum naupang zawk te hriselna a nghawng nat thin thu te, a hun tak a damdawi nen a enkawl a nih loh chuan nunna hlu tak chan theihna a nih thu a sawi a. Oral Rehydration Solution (ORS) leh Zinc hmang a enkawl dam theih a nih dan te leh kaw tha lo lak a mi tin kan him theih nan taksa, ei tur leh tui thianghlim hman a pawimawh thu a sawi bawk a ni. Chief Medical Officer chuan kaw tha lo lak a mipui kan him theih nana mahni invawn thianghlim kawng a zawm tur awm te leh ORS hmang a kaw tha lo enkawl dam theih a ni tih inzirtirna chu ‘Intensified Diarrhoea Control Fortnight’ chhung hian Kolasib district Hospital, Primary Health Centre leh Community Health Centre-ah te uar zawk a kalpui tur a nih thu a sawi.

Dr.RK Lalthlamuana, SMO chuan ‘Intensified Diarrhoea Control Fortnight’ kalpui chhung hian vengtin a Accredited Social Health Activist-te chuan naupang kum 5 chin te hnenah zirtirna an pek bak ah ORS packet 2 an sem tur thu a sawi a, PHC leh CHC tin ah ORS-Zinc Corner buatsaih a nih tur thu a sawi. SMO chuan Malaria Month hman mek a nih thu sawiin Kum 2020-21 chhunga Annual Parasite Incident (API) chu 0.38 a nih thu leh kum 2021-22 chhung hian hei aia a hniam beisei a nih thu a tarlang bawk a ni.

Vawiin thutkhawmah hian District Medical Superintendent, Executive Engineer, PHE leh DIPRO, Kolasib district chhung a Primary Health Centre, Community Health Centre-a Medical Officer, District Programme Manager, NHM leh ASHA Coordinator-te an tel a ni.