920/2022-2023
Mamit 16th June, 2022: Vawiin khan Pu Ngulzathuama(MCS), Zawlnuam BDO/Kawrthah SDO(Civil) chuan MzSRLM hnuaia Village Organization te tanpui nan Self Help Group te hnenah Custom Hiring Centre a hman tur Combined Rice Mill - 2(pahnih) leh Oil Maker Machine - 3 (pathum) a sem. Heng khawlte hi Mizoram State Rural Livelihood Mission atanga athlawn a dawn a ni.

Vawiin-a Village Organisation te tana pekchhuah Combined Rice Mill 2 hi Saikhawthlir leh Suarhliap te hnenah hlan a ni a, Saikhawthlir VO hnuaiah hian Self Help Group 10 an awm a, Suarhliap VO hnuaiah hian SHG 8 an awm a ni. Saikhawthlir Self Help Group te hian kum khat chhungin buh quintal 3000 – 4000 (300,000 kg – 400,000 kg) vel an tharchhuak thin niin an sawi a, Suarhliap Self Help Group te hian kum khat chhungin buh quintal 2000 (200,000 kg) vel an thar bawk. Saikhawthlir leh Suarhliap khuate hian leilet hi an eizawnna ber a ni a, Saikhawthlir khuaah hian in 200 vel awm mekin Suarhliapah hian in 120 an awm thung a ni. Suarhliap leh Saikhawthlir khua hian Rice mill (Buh deng khawl) pakhat (1) ve ve neiin, hei hian mipui mamawh a phuhru zo lo hle a, Tun a MzSRLM atanga mimal hawh theih tur an dawn hi an hmang tangkai hle tura beisei an ni. Buh bakah hian Vaimim leh Aieng her nan pawh hman theih tur a ni a, heng khaw pahnihah te hian Vaimim pawh an thar tha hle thin bawk.

Oil maker machine 3 te hi Saikhawthlir (Self Help Group–10), Chuhvel (SHG– 13) leh Bungthuam (SHG– 16) Village Organization te hnenah pakhat theuh pek an ni a. Chhawhchhi leh Antam mu atanga chawhmeh kanna Tel (edible oil) siamna tur a ni. Heng khua 3-ah te hian Chhawhchhi leh Antam mu nei chi hi an tha duh hle a, tuna khawl (Oil Maker Machine) pek atang hian nasa lehzual a hmalak an tum thu leh an phur thu an sawi. Heng khawl te hi darkar khat a Kg 15 her thei tur a ni.

Heng khawl te hman dan leh enkawl dan tur training hi company atanga technical expert te’n an pe nghal bawk.