919/2022-2023
Lunglei the 16th, June' 2022: Vawiin khan Civil Hospital Conference Hall, Lungleiah HDFC Bank chuan an Corporate Social Responsibility (CSR) Fund atangin Civil Hospital, Lunglei a hman tur medical hmanrua chi hrang hrang an hlan. He hun hi Lunglei Bawrhsap Pu Kulothungan A, IAS, chuan a hmanpui a ni.

Damdawi ina hman tur Medical hmanrua hlanna inkhawm Pu Rajnis Sarda, Cluster Head, HDFC Bank, Mizoram kaihhruaiah Pu Kulothungan A chuan HDFC Bank in Lunglei Civil Hospital tih changtlun nana hnathawhna tur hmanrua an pe chu damdawiin a thawktute chauh ni lovin mipui tan anih thu sawiin, Lunglei District hmasawnna kawngah pawh HDFC Bank te nen thawhhona tha tak an neih chhunzawm zel a duh thu a sawi a ni. Lunglei DC chuan CSR hmanga Lunglei Civil Hospital Laboratory changtlung zawk siamna tur pawh hmalak mek a nih thu a sawi a ni.

Dr. SR. Ngurchamliana, Medical Superintendent, Civil Hospital, Lunglei in lawmna thusawiin Civil Hospital Lunglei hi kum 1900 ah khum 10 neia bultan a ni a, tunah khum 162 awmin, khum 28 chu Covid-19 damlo te enkawlna tura tih a ni a, Lunglei Civil Hospital hi chhimlam District 4 te tana Hospital pawimawh tak a nih thu a sawi a, Covid 19 hri vanga harsatna kan tawh laiin Lunglei Bawrhsap thahnemngaihna avangin CSR Fund kaltlangin hmanrua tamtak kan neih phah a, CSR kaltlanga ruahman Liquid Waste Management, Civil Hospital a hman tur pawh cheng nuai 15 senga hmalak a nih tur thu a sawi a, HDFC Bank in medical hmanrua an pek avangin lawmthu a sawi bawk a ni.

Pu Sunny Bargohain, Director, DRR and Capacity building, Doctors For You pawhin an hnathawh dan tlangpui leh CSR an sem dan a sawi a ni.

Pi Lalhmingmawii, Area Head, HDFC Bank, Mizoram chuan lawmthu sawiin Lunglei District mipui te chu HDFC Bank lo dawr zel tura ngenin, HDFC Bank a account lo hawng zel turin mipuite a sawm a. CSR Fund atanga Lunglei District mipuite tana luanchhuah zel theihna turin thawhpuina an mamawh thu a sawi bawk.

HDFC Bank ten vawiina Civil Hospital, Lunglei a hman tur hmanrua an pek te hi Motorised ICU Bed - 5, Multi Para Monitor - 5, Suction Machine - 5, BiPAP Machine - 5, CPAP Machine - 5, Ventilator - 2, bak ah Median Transport Ventilator - 3 te an ni.